.webp){kind=icon}
Независната кандидатка Наташа Пирц Мусар победи на претседателските избори во Словенија во неделата, со што стана првата жена претседател во историјата на земјата, откако во вториот круг од изборите освои околу 54 отсто од гласовите, додека противникот Анже Логар доби поддршка од околу 46 отсто од гласачите, јави словенечката агенција СТА.
Пирц Мусар, поранешна новинарка и адвокатка специјализирана за заштита на личните податоци, која ја бранеше и Меланија Трамп, рече дека гласачите на демократските избори кажале каква Словенија сакаат.
Прочитајте повеќе: Адвокатка на Меланија Трамп на раб да стане претседателка на Словенија
Таа најави дека ќе се бори за основните човекови права, уставните права и демократијата и им се заблагодари на гласачите што излегоа на гласање, а особено на оние што гласаа за неа. Исто така, му честита и на противкандидатот Логар и му посака многу среќа понатаму.
„Ќе дадам сè од себе за вистински да бидам претседател на сите, да се борам за основните човекови права, уставните права и демократијата. Ќе дадам сè од себе да се обединиме во политиката околу стратегиските прашања“, рече Пирц Мусар.
Таа додаде дека се залага за квалитетно јавно здравје, како и за социјална и секаква друга сигурност.
„Колку е човек побезбеден, ќе има помалку сиромашни луѓе, помалку социјални проблеми, помалку криминал во нашата земја. Сакам Словенија да стане земја во која старите ќе бидат згрижени, каде што младите луѓе ќе сакаат да останат. Сакам Словенија каде што ќе бидеме посвесни дека нè очекуваат тешки времиња поради климатските промени“, рече Пирц Мусар.
Неа ја поддржаа симпатизерите на сите три партии од владејачката коалиција (Движење за слобода, Социјалдемократи - СД и Левица), но и неопределени гласачи.
Логар во првиот круг од претседателските избори пред три недели доби најмногу гласови. За него гласаа 33,95 отсто од гласачите, додека за Пирц Мусар 26,88 отсто.
Освен двајцата, за претседателската функција на Словенија конкурираа уште петмина кандидати – Милан Брглез, Јанез Циглер Краљ, Миха Кордиш, Владимир Пребилич и Сабина Сенчар.
Овие претседателски избори се седми во историјата на независна Словенија. Милан Кучан беше претседател во два петгодишни мандата, а по него со Словенија претседаваа Јанез Дрновшек и Данило Тирк, а потоа во два мандата Борут Пахор.
