.webp){kind=icon}
Германскиот канцелар Олаф Шолц не сака да започне нова прекуокеанска трговска војна со САД и е загрижен дека францускиот претседател Емануел Макрон го охрабрува ваквиот развој на настаните.
Макрон, кој планира да го посети Вашингтон кон крајот на месецов, силно го турка т.н. закон „купувај европско“, со намера да ги заштити првенствено европските производители на автомобили, во контекст на контроверзното американско законодавство што го поттикнува домашното производство на електрични возила, и сака да ја намали зависноста од кинеските делови за батерии и други материјали.
Според официјални претставници на Европската Унија, американскиот закон ги прекршува правилата на Светската трговска организација, а министерот за финансии на Макрон неделава го обвини Вашингтон дека настојува да спроведе индустриска политика во кинески стил, која ги дискриминира неамериканските компании.
Но германските власти, иако признаваат дека треба да се поддржи европската индустрија, сметаат дека влегувањето во конфликт со Вашингтон во ова време на геополитичка нестабилност и војната во Украина би било стратегиска грешка.
Bloomberg
Берлин се надева дека администрацијата на Џо Бајден ќе ја приспособи легислативата за да земе предвид барем некои од грижите во Европа, па состанокот на американско-европскиот совет за трговија и технологија, кој ќе се одржи на 5 декември, може да биде вистинската можност за да се најде компромис.
Недостигот од координиран француско-германски одговор на т.н. американски закон за антиинфлација е последниот сигнал за јазот меѓу двете највлијателни земји во ЕУ и можеби доказ дека сојузништвото меѓу двата соседа не е толку силно.
Во последните месеци двете земји не се согласија за некои клучни политики, како што се мерките за заштита на сопствените економии во енергетската криза, одбранбените проекти и нуклеарната енергија. В петок, Шолц ја пречекува француската премиерка Елизабет Борн во Берлин, што е можност за мало усогласување на позициите.
Французите сметаат дека европскиот одговор кон Американците треба да вклучи дискусии и прифаќање на легислатива за заштита на европската индустрија.
Но сега Германците и Французите треба да најдат договор за тоа како треба да изгледа новиот закон на крајот.
Земјите се согласуваат дека потребата за проектот е поширока од заедничкиот европски интерес.
Германскиот министер за финансии Кристијан Линднер, кој им припаѓа на либералните демократи и се противи на големи владини интервенции во економијата, смета дека ова е ситуација во која не треба да ѝ се наштети на администрацијата на Бајден, туку треба да се разговара за нова рамка за трансатлантска слободна трговија.
Неговиот колега, министерот за економија Роберт Хабек, од редовите на зелените, инсистира на еднаква пазарна конкуренција, но исто така ги поздравува американските субвенции за климата и сака ЕУ побрзо да се движи кон развој на технологии што ќе овозможат постигнување на целите за заштита на животната средина.
Европската комисија ги повикува земјите-членки на одржување на единството во однос на САД, но и изразува песимизам за веројатноста да се најде решение за европската загриженост за американскиот протекционистички потег.
Имено, Брисел тврди дека САД не покажуваат знаци на брзина во решавањето на овој проблем.
Во овој контекст, Комисијата подготвува фонд за поддршка на клучните индустрии, кој би се финансирал со заедничко задолжување, но истовремено предупредува на штетата што може да ја предизвика глобалната трка во субвенциите, велат извори блиски до разговорите на таа тема.
