.webp){kind=icon}
Кирјакос Мицотакис ја порази опозицијата на парламентарните избори oдржани во неделата и обезбеди силен мандат за следните четири години, уверувајќи ги пазарите дека ќе може да спроведе политики поволни за инвеститорите.
„Структурните реформи се од суштинско значење за Грција да го реализира својот огромен потенцијал, да ги зголеми инвестициите и да ја надмине еврозоната во однос на растот, притоа избегнувајќи надворешни нерамнотежи“, рече главниот економист и заменик-извршен директор на „Еуробанк“ (Eurobank SA), Тасос Анастасатос, пред изборите. „Тие исто така ќе обезбедат земјата брзо да се искачи повисоко на скалата за кредитен рејтинг“, рече тој.
Прочитајте повеќе: Грција: Убедлива победа на Нова демократија на Мицотакис
Прочитај повеќе
Грција: Убедлива победа на Нова демократија на Мицотакис
Нова демократија има 20 отсто разлика во однос на ПАСОК и Сириза
25.06.2023
Мицотакис ќе се обиде да се справи и со дефицитот на тековната сметка на Грција, кој поради шокот во цената на енергијата се искачи на 9,6 отсто од бруто-домашниот производ во 2022 година, од 5,5 отсто претходната година.
Тој рече и дека борбата против даночното затајување ќе биде еден од приоритетите на неговата нова влада. Шефот на Банката на Грција, Јанис Стурнарас, изјави за „Ин.гр“ (In.gr) дека Грците пријавиле приходи во вредност од 80 милијарди евра, иако потрошувачката била 140 милијарди евра, а депозитите истовремено пораснале.
„Тоа не е само прашање на даночна правда туку и прашање на добро планирање на буџетот и начинот на кој функционира државата“, рече во интервју Марија Гавунели, генерална директорка на атинскиот истражувачки центар „Елиамеп“ (Eliamep).
Мицотакис вети дека ќе ја зголеми минималната плата за време на својот следен четиригодишен мандат на 950 евра месечно од 780 евра. Во 2010 година, пред должничката криза во земјата, таа изнесуваше 740 евра. Тој исто така рече дека просечниот месечен приход во приватниот сектор ќе се зголеми на 1.500 евра од нешто помалку од 1.200 евра до крајот на неговиот мандат, бидејќи продолжува да се обидува да привлече повеќе инвестиции во земјата, што ќе донесе подобро платени работни места.
Грција е една од земјите што имаа најголема корист од средствата на Европската Унија доделени преку Фондот за закрепнување и отпорност, кој беше формиран за да им помогне на членките на ЕУ да ги надминат последиците од пандемијата.
