На 28 јануари ќе биде закажана седницата за избор на техничката влада, а потоа и втора седница за избор на дополнителните заменици министри, како и за верификација на мандат на пратеник. Претседателот на Владата Димитар Ковачевски и претседателот на Собранието Талат Џафери, кој е мандатар на техничката влада, оставки ќе поднесат утре, со што почнуваат и крајните рокови за составување на преодната влада, која се носи сто дена пред изборите за пратеници на 8 мај.
Џафери денеска на средба со новинарите објасни како ќе течат постапките, но исто така рече дека ако има предлози нема пречка министрите на ВМРО-ДПМНЕ да не бидат дел од техничката Влада. Тој не сакаше да каже дали ќе има кадровски промени кај министрите од ДУИ и Алијанса на Албанците во оваа Влада. Предлозите на СДСМ се веќе познати.
„Утрешниот ден е денот „Д“ за поднесување оставки. Од Владата до мене како претседател на Собранието ќе достави информација дека поднесува оставка, и јас како претседател на Собранието ќе го известам Претседателот на државата дека Владата поднела оставка. ќе го овластам потпретседателот на Собранието Горан Мисовски да ја води седницата на 26 јанури во петок и потоа ќе поднесам оставка“, посочи Џафери.
На седницата во петок, која е прва наредна седница, ќе бидат констатирани оставките на премиерот и неговата, а потоа пред да се гласа дневниот ред, ќе се предложи нова точка - избор на претседател на Собранието. По изборот, во случајов на Јован Митрески за претседател на Собранието, тој ќе извести претседателот дека од име на мнозинската коалиција во Собранието е избран за претседател. На 26 јануари, како што објасни Џафери, претседателот на државата Стево Пендаровски треба да му го довери мандатот за премиер на техничката Влада и роковите ќе почнат да течат.
На 27 претпладнето Џафери до Собранието треба да достави програма и состав на Владата, а седницата за избор треба да биде свикана на 28 јануари. Како што појасни за да се комплетира техничката влада, ќе биде свикана уште една седница на која треба да се гласа за дополнителните заменици министри и за верификација на мандат на пратеник.
Џафери вели дека иако се предвидени два дена за дебата, според досегашната воспоставена практика тоа се завршувало за еден ден.
За најавите дека ВМРО-ДПМНЕ нема да гласа зо него, вели дека не се оптеретува со тоа кој како ќе гласа. За изјавите на претставниците на албанската опозиција, вели дека не ги коментира.
Двојните избори кои ќе се спроведат во април и мај државата ќе ја чинат речиси 17 милиони евра, соопшти потпретседателката на Државната изборна комисија (ДИК), Дитмире Шеху на денешната 73 седница, на која се изгласаа вкупно 22 точки на дневниот ред.
Шеху на денешната седница образложи дека над шест милиони евра ќе одат за организирање на изборите, со обезбедување на доверлив и недоверлив материјал, транспорт, паричен надоместок за избирачките органи, односно на членовите на општинските изборни комисии, избирачките одбори, додека за платено политичко рекламирање за двојните избори се предвидени 656 милиони денари или над 10.614.000 евра.
„За претседателски избори ќе се користат повеќе средства во делот на платено политичко рекламирање, затоа што во првиот круг за претседателски избори на сите учесници во изборите им следува по две евра за запишан избирач, уште еднаш да повторам на запишан избирач на избирачкиот список.“, вели Шеху.
Таа додаде по едно евро по запишан избирач им следува на кандидатите кои ќе бидат во вториот круг, додека за парламентарните избори по две евра на сите учесници во избори, исто така на запишан избирач.
„Од вкупните средства што ги баравме од Министерството за финансии, сите средства ни се дадени, само недостасуваат во делот на платено политичко рекламирање, каде со министерот за финансии се договоривме дека овие средства ќе ги надополнат, подоцна, бидејќи средствата за платено политичко рекламирање се плаќаат 30 дена по конечноста на резултатите. Ова нема да влијае во текот на организирањето на изборите,“ вели Шеху.
Таа посочи дека ДИК нејзините членови и вработени веќе една година се подготвуваат за двојните избори да поминат во фер, демократска атмосфера и да бидат безбедни.
„Идентификацијата на гласачи ќе биде со отпечаток од прст, што беше усвоено и ставено во законот од 2020 година“, вели Шеху.
.webp){kind=icon}
