.webp){kind=icon}
Секретаријатот на Европската енергетска заедница почна процедура за покренување постапка против Македонија затоа што не ја имплементира РЕМИТ регулативата.
Оваа регулатива ги утврдува правилата за обезбедување на интегритет и транспарентност на енергетскиот пазар. Македонија имала обврска имплементацијата на РЕМИТ регулативата да ја заврши до 29 ноември 2019 година.
Лани во јули од Секретаријатот испратиле допис до македонското Министерство за економија. Со него барале информации за преземените мерки за имплементација на РЕМИТ. Министерствто одговорило дури во ноември лани, во одговорот стои дека за нацрт амандманите ќе има јавна расправа. На 30 ноември Секретаријатот уште еднаш укажал на нерешените прашања.
Потоа, на 05 јули годинава Секретаријатот констатирал дека иако процедурата за измени и дополнувања во Законот за енергетика завршила, амандманите кои се однесуваат на РЕМИТ регулативата не се усвоени.
„Северна Македонија до денес не донела ни една национална мерка за исполнување на обврските, за усвојување на законите, прописите и административните одредби потребни за РЕМИТ регулативата. Значи, Северна Македонија не ги исполнила барањата “, стои во информацијата за почнувањето на постапката против земјава.
Освен против Македонија, ЕЕЗ почнува процедура за покренување постапка и против Србија бидејќи не ги имплементирала кодовите за мрежно поврзување. Обврската требало да ја заврши до средината на 2018 година. Постапка има и против Косово затоа што не ја имплеменира Директивата за оценување на влијанието врз животната средина. Рокот за Косово истекол во јануари 2019.
