Кој колку пратеници ќе има во новиот собраниски состав, кој треба да се конституира за 20 дена

Според првичните резултати од вчерашните парламентарни избори што Државната изборна комисија (ДИК) ги објави утрово на својата веб-страница, од обработени над 99,27 проценти од гласовите, коалицијата Твоја Македонија на ВМРО-ДПМНЕ има освоено 431.251 (43,23 проценти) или 58 мандати во новиот 120-член собраниски состав, Коалицијата за европска иднина предводена од СДСМ 153.250 (15,36 проценти) - 18 пратеници, Европскиот фронт на ДУИ 137.486 (13,78 проценти) - 19 пратеници, коалицијата од албанскиот опозициски блок Вреди 106.991 (10,72 проценти) - 13 мандати, Левица има 67.338 гласа (6,75 проценти) - 6 пратеници, а движењето ЗНАМ - За наша Македонија 55.539 (5,57 проценти) - 6 пратеници. Преостанатите партии и коалиции што учествуваа на изборите имаат под еден процент гласови.

Мандатот на новоизбраниот собраниски состав почнува да тече од конститутивната седница на Собранието. Според одредбите од Уставот, новоизбраното собрание се состанува на конститутивна седница најдоцна 20 дена по одржаните избори. Конститутивната седница ја свикува претседателот на Собранието од претходниот состав.

Доколку не се закаже конститутивна седница во предвидениот рок, пратениците сами се состануваат и го конституираат Собранието на дваесет и првиот ден од денот на завршувањето на изборите.

Собранието го сочинуваат 120 пратеници. Пратениците се избираат на општи, непосредни и слободни избори со тајно гласање, а пратеникот ги претставува граѓаните и во Собранието одлучува по свое уверување.

Право на глас на парламентарните избори имаа 1.815.350 граѓани запишани во избирачкиот список.

Се гласаше во согласност со пропорционалниот модел во шест изборни единици. Гласање за парламентарните избори во дијаспората не се спроведе бидејќи немаше доволен број пријавени наши државјани.

Првичните резултати од гласањето добиени по електронски пат ДИК ги објавува сукцесивно, а резултатите од записниците од ОИК во рок од 12 часа по завршувањето на изборите.

Конечните резултати од изборите ДИК ги објавува во рок од 24 часа од денот на нивната конечност.

Ова се единаесетти парламентарни избори од независноста на државата.

Во моментов нема коментари за веста. Биди прв да коментира...

Остави коментар