Мандатарот Христијан Мицкоски, денеска до Собранието го достави предлогот за состав на владата и програмата за нејзината работа. Собраниската седница за избор на новата влада се очекува да биде закажана за в сабота, а таа треба да заврши најдоцна до недела на полноќ.
„Граѓаните очекуваат брзи резултати за она што оваа влада го ветуваше дека ќе го испорачува. Не ветувавме многу за време на кампањата, туку верувавме дека земјава ќе биде повторно на граѓаните. Изминативе седум години државата беше заробена од неколкумина властодршци“, рече Мицкоски.
Тој најавува бескомпромисна борба со криминалот, без разлика од која партија доаѓа злоупотребата. Мицкоски рече дека во последниов период до нив стигнуваат бројни информации за злоупотреби кои се случувале изминатите седум години.
„Планираме да расчистиме со сомнежите и информациите кои последниов период стигаат до нас, за многу злоупотреби изминативе седум години, тоа им го должиме на граѓаните. Очекувам брзи резултати во делот на економијата. Младите ќе бидат наш главен акцент, сведоци сме на класичен егзодус на млади кои ја напуштаат земјава, за жал 8/10 мои студенти кога ќе ги прашате за нивните планови по завршувањето на студиите, велат дека одлучиле да ја напуштат земјава. Таа перцепција треба да се промени, со напорна работа, без поделба од прв, втор и трет ред граѓани“, рече Мицкоски.
Мицкоски го повтори предлогот за идна влада, односно досегашниот технички министер за внатрешни работи Панче Тошковски ќе биде министер во овој ресор, во Министерството за надворешни работи и надворешна трговија ќе седне актуелниот градоначалник на Општина Аеродром Тимчо Муцунски, а нова министерка за финансии ќе биде потпретседателката на ВМРО-ДПМНЕ Гордана Кочоска Димитриеска.
За заменик-претседател на Владата и министер за транспорт е предложен партискиот потпретседател и пратеник во повеќе мандати Александар Николовски, за ресорот одбрана – Владо Мисајловски, кој досега беше пратеник, а претходно беше и министер за транспорт, а за информатичко општество и дигитална трансформација е предложен досегашниот дополнителен заменик министер во овој ресор Стефан Андоновски.
Министер за локална самоуправа ќе биде поранешниот директор на ЈП „Водовод и канализација“ Златко Перински кој во изминатиот период го водеше и кабинетот на Мицкоски.
За новоформираното Министерство за енергетика, рударство и минерални суровини е предложена Сања Божиновска, актуелен член на ИК и експерт во енергетиката, Цветан Трипуновски останува во Министерството за земјоделство, шумарство и водостопанство. Професорката Весна Јаневска е предлог за министерка за образование и наука, во министерската фотелја во ресорот култура и туризам ќе седне актерот Зоран Љутков, а во Министерството за спорт ракометарот Борко Ристовски.
Вицепремиерски места ќе имаат и коалициските партнери Социјалистичката партија и Демократската партија на Србите. Љупчо Димовски, претседателот на СП ќе биде вицепремиер и министер за политички систем, а Иван Стоиљковиќ, претседателот на ДПС вицепремиер задолжен за односи со заедниците, додека Шабан Салиу ќе биде министер без ресор задолжен за интеграција и имплементација на декадата на Ромите.
За министер за животна средина и просторно планирање и заменик-претседател на Владата, е предложен Изет Меџити од коалицијата Вреди, министер за здравство – Арбен Таравари, министер за социјална политика, демографија и млади Фатмир Лимани, министер за економија Бесар Дурмиши. За министер без ресор и заменик-претседател на владата задолжен за добро владеење е предложен Арбен Фетаи.
За министер за правда е предложен Игор Филков, додека за министер за јавна администрација Горан Минчев од Движењето ЗНАМ.
.webp){kind=icon}
