Почнува собраниската постапка за дополнување на Законот за енергетика

Собранието денеска ќе ја одржи осмата седница, на која на дневен ред се верификација на мандатот на пратениците и предлог-законот за дополнување на Законот за енергетика, по скратена постапка.

Дополнувањето на Законот за енергетика, со цел да се спречи зголемување на цените на струјата од 1 јули, го поднесоа премиерот Христијан Мицкоски, пред неговиот избор, и пратениците Бојан Стојановски, Тони Јаревски и Марија Митевска од ВМРО-ДПМНЕ.

МИА

Со измените во Законот треба во наредните шест месеци да се спречи зголемување на цената на струјата, а од јануари 2025 година да се намали цената на електричната енергија и за домаќинствата и за индустријата.

Според предлогот, се очекува цената на електричната енергија да не се зголеми за првата и втората група потрошувачи, додека за третата и четвртата тарифна група зголемувањето ќе биде од еден до два проценти.

Со предлог-законот за дополнување на Законот за енергетика, по скратена постапка, со членот 1 се врши дополнување на членот 101 односно се додава став (10), чија цел е утврдување на исклучок од ставот (9) односно доколку назначениот универзален снабдувач ја обезбедувал универзалната услуга до завршувањето на утврдената тендерска постапка, да не биде должен да основа ново друштво за обезбедување на услугата. Со ваквата одредба, освен сигурно и безбедно, се обезбедува и континуитет во снабдувањето со електрична енергија.

Претходно во интервју за „Блумберг Адрија“ и новата министерка за енергетика, рударство и минерални суровини во Македонија, Сања Божиновска, рече дека новата влада ќе може да интервенира во цената на електричната енергија од јануари следната година.

„Ние како нова влада нема да можеме да реагираме до јануари, откога во иднина ќе се утврдува цената на струјата, а не како досега на почетокот на јули. Имено, најголем проблем е што цената на дистрибуцијата, односно на нисконапонско ниво на кое ЕВН е сопственик и цената на преносот со кој стопанисува државната компанија МЕПСО се нивелираат еднаш годишно, и тоа на почетокот на годината, така што не може сега да ги нивелираме. Може да се нивелира само цената на електричната енергија со која компанијата што конкурира на тендерот ја испорачува до снабдувачот. Поентата е дека сето она што се случува сега ќе може да се коригира и ќе се коригира од јануари“, вели таа.

Сања Божиновска/Приватна архива