Претседателката на Европската комисија (ЕК), Урсула фон дер Лајен, денеска во Скопје на заедничката прес-конференција со премиерот Христијан Мицкоски нагласи дека ги вложуваат сите напори со цел земјава да ги отвори преговорите за првиот кластер „Темели“, но додаде дека e потребнo да се разработат и уставните измени.
Фон дер Лајен на новинарско прашање за тоа дали смета дека условувањата кон земјава за уставни измени се диксриминирачки, но и дали уставните измени со одложено дејство се прифатливи, рече дека ЕУ ќе ѝ помогне на Северна Македонија да ја спроведе преземената обврска на секој дел од патот.
„Ние ќе помогнеме да се спроведе обврската што Северна Македонија ја презеде како суверена земја на секој дел од патот. За мене е мошне важно тоа што имаме јасна цел. Работам колку што можам за да можеме да ги отвориме преговорите за кластерот ’Темели’, тоа е нашата краткорочна цел засега и уставните промени треба да се разработат. За мене тоа е важно, важно е и, во интерес на Северна Македонија, да бидеме успешни и затоа сакам да ве уверам дека ќе бидеме со вас на секој дел од патот за да стигнеме до заедничката цел. Може да сметате на нас. И мене ми е навистина важно, да не се вртиме многу наназад, туку да гледаме кон иднината и сакаме да го пишуваме следното поглавје од нашата заедничка иднина“, рече претседателката на ЕК.
На прашање дали за Фон дер Лајен се прифатливи уставните измени со одложено дејство, премиерот Мицкоски не одговори конкретно, рече дека Владата ќе работи напорно за да дојдеме до целта - зачленување во ЕУ, дека тој лично ќе работи за интересите на граѓаните, меѓу кои се и воспоставување на европските вредности кај нас, но истовремено граѓаните да не бидат понижени.
Претседателката на ЕК оддаде почит и за, како што рече, стопроцентната усогласеност на земјава со надворешната и безбедносната политика на ЕУ, како и за поддршката на Украина, и се осврна на придобивките од планот за раст на Западен Балкан.
„Тоа е нашиот заеднички патоказ да ги приближиме економиите на Западен Балкан до нашите и постепено да ги интегрираме нашите економии. Ја отвораме вратата на единствениот европски пазар во одредени сектори за компании од Северна Македонија, а за возврат вие ќе спроведете важни реформи за да имаме изедначено поле за игра, а тоа ќе биде придружено со дополнителни инвестиции од ЕУ во Северна Македонија. Мина веќе една година откако го почнавме ова и морам да кажам дека земјите од регионот ги испорачаа своите резултати, ја имаат агендата за реформи, исто и Северна Македонија. Северна Македонија заврши навистина добра работа, имаме одлични реформи и треба да почнеме со 52 милиона евра до крајот на годината, а треба да добиете повеќе од 750 милиони евра според планот за раст“, рече Фон дер Лајен.
.webp){kind=icon}