ЕУ ќе бара мерки за рационализација и давачки поради енергетската криза

Претседателката на Европската комисија, Урсула фон дер Лаен, ќе предложи радикални чекори за запирање на енергетската криза, вклучувајќи мерки за рационализација и повици за оданочување на профитот на енергетските компании.

Предлозите што треба да ги претстави денеска во говорот пред Европскиот парламент ќе ги заострат дискусиите меѓу земјите-членки, кои имаат различни приоритети и проблеми. Таа веќе мораше да се откаже од идејата за наметнување ограничувања на цените на увезениот руски гас поради противење и поделеност.

Но, цените на гасот се намалуваат - делумно поради подготвеноста на блокот да воведе одредени мерки. Клучното прашање за пазарите е дали нејзиниот предлог за намалување на потрошувачката на гас за 5 отсто ќе ги преживее различните фази од преговорите. Иако е тешко, тоа би било голем чекор кон намалување на енергетскиот дефицит со кој се соочува континентот откако Русија почна да го намалува протокот на гас.

Пазарите, исто така, се надеваат дека европските регулатори ќе воведат мерки за намалување на притисокот врз трговците со енергија предизвикан од зголемените барања. Комисијата разговара со финансиските регулатори, а Европската управа за хартии од вредност и пазари во вторникот соопшти дека „активно разгледува дали, покрај таквиот надзор, се неопходни и какви било регулаторни мерки“.

Неколку земји веќе презедоа чекори за поддршка на енергетските компании во обид да го запрат исход каков што веќе еднаш имаше со „Леман Брадерс“ (Lehman Brothers) во 2008 година. Сè уште се расчистуваат сите мерки за ликвидност.

„Знаеме дека има одредени напори околу ликвидноста. Треба да можеме да им пристапиме на тие регулатори и да разбереме како тоа ќе функционира ефективно“, рече комесарката за финансиски услуги на ЕУ, Мериад Мекгинис, во интервју во текот на викендот. „Ги разгледуваме и прекинувачите, но повторно, деталите ќе се дискутираат понатаму“.

Главните точки на планот на Фон дер Лаен, според најновите нацрти, се:

•  Ограничување на приходите од производството на енергија преку обновливи извори и нуклеарни компании на 180 евра по мегават час. Акциите на комуналните претпријатија пораснаа во вторникот бидејќи тоа ниво останува повисоко од предвоените.
• Давачки за компаниите во индустријата за нафта, гас, јаглен и рафинерии од најмалку 33 отсто од нивниот екстра профит. Врз основа на добивките пред оданочување од фискалната 2022 година, кои се над 20 отсто повисоки од тригодишниот просек, почнувајќи од 2019 година. Тоа е привремена мерка и останува на земјите-членки да аплицираат.
• Целта е да се намали вкупната потрошувачка за 10 отсто, а задолжителна цел е намалување на потрошувачката во одредени часови за 5 отсто.

 

Предизвикот ќе биде да се најде решение на ниво на целата унија кое ќе одговара на секоја земја-членка поради нивните различни извори на енергија, богатство и индустриска сила. Состанокот на министрите за енергетика минатата недела покажа колку се длабоки некои поделби.

Во обид да се постигне договор пред октомври, кога започнува зимската грејна сезона, Чешка, која претседава со ЕУ, свика уште еден итен состанок за 30 септември. Како што растат цените, како и протестите поради зголемените трошоци за живот, Брисел се обидува да одржи одреден степен на единство и да спречи различни политики на членките што на крајот би го поткопале единствениот пазар.

„Не постои волшебно стапче кое ќе ги врати цените на предвоените нивоа. Со насочен пакет за вонредни состојби, можеме да го намалиме притисокот врз цените и да им помогнеме на граѓаните“, рече еврокомесарот за енергетика Кадри Симсон.

Во моментов нема коментари за веста. Биди прв да коментира...

Остави коментар