Битката за „Адико банка“ се разгорува, „НЛБ“ ја качи понудата на 33,5 евра по акција

Нова Љубљанска банка (НЛБ) објави дека ќе ја зголеми цената во својата доброволна јавна понуда за преземање на австриската „Адико банка“ (Addiko) на 33,5 евра по акција.

Новата цена е за 26,4 проценти повисока од понудата објавена од „Рајфајзен Банк Интернешнл“ (RBI) кон средината на мај, што дополнително ја заостри трката „НЛБ“ да ја преземе „Адико“. Словенечката банка вели дека нивната понуда им обезбедува поголема јасност и сигурност на акционерите бидејќи станува збор за едноставно плаќање во готово без условни или последователни дополнителни плаќања.

Според податоците објавени од „НЛБ“, новата цена претставува премија од 30 проценти во споредба со шестмесечната пондерирана просечна цена на акцијата на „Адико“ од 25,78 евра на крајот од тргувањето на 29 мај. Во исто време, таа е за 26,4 проценти повисока од цената на акциите на затворање на пазарот на тој ден.

Банката истакнува дека очекува навремено да ги добие сите потребни регулаторни одобренија, вклучително и оние од Европската централна банка. „НЛБ“ наведува дека Словенија, Австрија и Хрватска се исто така дел од Единствениот надзорен механизам (SSM), а и „НЛБ“ и „Адико“ се директно надгледувани од ЕЦБ.

Извршниот директор на „НЛБ“, Блаж Бродњак, истакна дека предноста на нивната понуда е нејзината едноставна структура.

„Цената на понудата на ‘НЛБ’ е лесна за разбирање и може целосно да се пресмета бидејќи нема условни плаќања што може, но и не мора да се платат. Во споредба со конкурентската понуда, ‘НЛБ’ веќе понуди попривлечна цена, што беше препознаено и од Управниот одбор на ‘Адико банка’. По планираното зголемување, нашата понуда ќе биде уште попривлечна. Врз основа на сите активности и дискусии со релевантните регулатори во текот на изминатите повеќе од две години, ‘НЛБ Групацијата’ очекува навремено да ги добие сите потребни регулаторни одобренија, вклучително и одобрение од ЕЦБ, која објективно ќе ги процени сите околности“, рече Бродњак.

Тој додаде дека мнозинството акционери на „Адико“ сè уште не се изјасниле дали имаат намера да прифатат некоја од понудите.

„Секој од нив треба независно да ја процени понудата на ‘НЛБ’ и да донесе своја одлука. Остануваме убедени дека нашата понуда јасно ја одразува долгорочната вредност и перспективите на ‘Адико Банка’“, рече тој.

„НЛБ“ моментално не поседува акции на „Адико“. Другите услови на понудата остануваат непроменети, а нејзиното заклучување и понатаму зависи од стекнувањето на најмалку 75 проценти од правата на глас, добивање регулаторни одобренија и исполнување на други вообичаени услови за затворање.

Банката, исто така, изјави дека е свесна за објавата на друштвото „Алта Пеј“ (Alta Pay) за нејзината намера да го понуди својот удел од 9,63 проценти во „Адико“ на конкурентската страна. Сепак, нагласува дека нема задолжителна обврска за тоа и дека акциите сè уште не се испорачани.

Според проценките на „НЛБ“, дури и по зголемувањето на цената,  трансакцијата треба значително да придонесе за профитот на групацијата од втората цела година по преземањето, додека ефектот во првата година би бил во голема мера неутрален.

На крајот на 2025 година, „Адико“ имаше актива пондерирана според ризикот од 3,9 милијарди евра, што е во согласност со претходно објавениот капацитет за аквизиција на „НЛБ“ од околу четири милијарди евра.

„НЛБ“ е најголемата банкарска и финансиска групација во Словенија и најголемата финансиска групација со седиште во Југоисточна Европа. На крајот на мај, пазарната капитализација на банката изнесуваше 4,38 милијарди евра.

Покрај во Словенија, групацијата работи и во Босна и Херцеговина, Црна Гора, Косово, Македонија и Србија, додека е присутна во Хрватска преку лизинг операции. Од 2020 година, „НЛБ“ изврши две големи банкарски аквизиции, купувањето на „Комерцијална банка“ во Србија и „Сбербанка Словенија“, а во 2024 година ги купи и „Самит Лизинг“ во Словенија и хрватскиот „Мобил Лизинг“.