Борбата за „Адико“ влегува во завршница во корист на „Рајфајзен“

„Рајфајзен банка“ (Raiffeisen Bank International) објави значаен напредок во процесот на преземање на „Адико банка“ (Addiko Bank), обезбедувајќи поддршка од акционери што поседуваат повеќе од 50 проценти удел.

Според соопштението објавено во вторникот, австриската банкарска групација до 9 јуни во 9:30 часот собрала изјави за прифаќање на понудата за вкупно 9.831.951 акција, што претставува удел од 50,42 проценти.

„Тоа вклучува 1.878.167 акции на ’Адико банка’ во сопственост на компанијата ’Алта груп’, што одговара на удел од 9,63 проценти од сите издадени акции на ’Адико банка’“, се наведува во соопштението.

Овој развој на настаните дополнително ја заострува конкуренцијата со словенечката НЛБ, која минатата недела ја зголеми својата понуда на 33,5 евра по акција.

Наддавање со понуди и поддршка од управата

Иако „Рајфајзен банка“ нуди 26,50 евра по акција, НЛБ ја зголеми понудата на 33,50 евра, што е речиси 26 проценти повеќе. И покрај разликата во цената, извршниот одбор на „Адико банка“ им препорача на акционерите да ја прифатат понудата на „Рајфајзен“.

Како клучен аргумент за оваа препорака, управата наведува поголем степен на сигурност дека трансакцијата со „Рајфајзен“ навистина ќе биде реализирана. Притоа се укажува на можни регулаторни пречки со кои би можела да се соочи НЛБ, особено на хрватскиот пазар, каде што веќе има значителен пазарен удел.

Значајна поддршка на австриската понуда даде „Алта груп“, која поседува 9,63 проценти од акциите на „Адико банка“. Таа меѓу првите ја прифати понудата на „Рајфајзен“, со што значително придонесе за достигнување на сегашниот удел од 50,42 проценти.

 

Рокот за прифаќање на двете понуди истекува на 22 јули, што остава доволно време за понатамошни одлуки и потези на преостанатите акционери.