Словенија: Целата градежна оператива се упатува во критичните подрачја

Ситуацијата по најголемата елементарна непогода во Словенија се уште не е смирена, но онаму каде што водата се повлекла, открила какви големи штети остава зад себе. Не само зградите, уништен е и голем дел од инфраструктурата, целосно исчезнаа многу мостови и патишта.

Министерката за инфраструктура Аленка Братушек денеска се сретна со претставници на компаниите Дарс, СЖ - инфраструктура, ДРИ - компанијата за развој на инфраструктурата и Дирекцијата за инфраструктура на Република Словенија. На средбата се разговараше за можностите за што побрзо давање помош и воспоставување пристапност до инфраструктурните објекти во подрачјата погодени од катастрофални поплави.

На средбата се договориле дека со најголемата елементарна непогода во Словенија значително ќе се променат приоритетите во делот на државната инфраструктура. Прв приоритет е да се овозможи транспорт до сите места во Словенија, соопшти Министерството за инфраструктура.

На средбата донеле одлука за стопирање на сите инвестиции кои не се итни, со цел градежната оператива да биде достапна за санирање на штетите. Во рок од седум дена Дирекцијата, Дарс и Словенечките железници мора да подготват список на неитни инвестиции.

Целата градежна механизација и сите расположливи градежни и инженерски екипи ќе бидат насочени или прераспоредени во областите погодени од природната катастрофа.

Дополнително, во следните 14 дена, Дирекцијата за инфраструктура на Република Словенија не смее да потпише никакво ново решение за избор на изведувач и каков било нов договор со кој би презела нови обврски.

Мора да ги проверат и сите поплавени и оштетени мостови и патни мрежи. Во понеделник ќе се свика состанок со сите концесионери и другите поголеми градежни компании за приоритетниот третман за санирање на штетите по невремето.

Исклучените врски предизвикуваат и големи проблеми за многу бизниси низ државата, бидејќи многумина кои не беа поплавени немаат пристап. Од Трговско-индустриската комора на Словенија (ГЗС) пристигнуваат првите проценки за економските штети од терен: некои компании пријавуваат милионски штети на материјали и опрема. Некои нема да можат да започнат со производство неколку недели.

Во моментов нема коментари за веста. Биди прв да коментира...

Остави коментар