Хрватската влада ги ограничи цените на електричната енергија за граѓаните и стопанството од почетокот на октомври до крајот на март следната година за да ги ублажи последиците од силниот раст на цените на енергијата.
"Нашиот пакет е силен, фер и сеопфатен", рече премиерот Андреј Пленковиќ на почетокот од состанокот на владата. Вкупниот пакет мерки изнесува речиси 21 милијарди куни, од кои скоро 6 милијарди куни се однесуваат само на цените на електричната и топлинската енергија.
Домаќинствата со полугодишна потрошувачка до 2500 киловат часови ќе плаќаат мегават час по цена од 59 евра, а над ова, цената ќе изнесува 88 евра за киловат час.
Мерката вреди 3,1 милијарда куни, рече Пленковиќ.
Институциите како што се градинки, училишта, факултети или болници ќе плаќаат 62 евра за мегават час, а мерката има буџетска вредност од 1 милијарда куни.
Што се однесува до претприемачите, оние кои трошат до 250 илјади киловат часови ќе плаќаат по 0,5295 куни, додека оние кои трошат повеќе од таа сума, ќе платат 1,6176 куни за киловат час.
За големите потрошувачи кои трошат повеќе од 2,5 гигават часови, цената ќе изнесува 230 евра за мегават час.
Владата, исто така, одлучи да ја задржи истата цена на топлинската енергија, односно цената на греењето во текот на зимските месеци нема да се промени.
Според Пленковиќ, целта на хрватската влада е да се забрза енергетска транзиција кон обновливи извори на енергија и кон поенергетски поефикасна економија.
Од 1-ви октомври владата, исто така, ќе ги ограничи цените на одредени основни прехранбени производи. Така, цените на маслото, млекото, брашното, шеќерот и одредени категории месо, како што се пилешкото месо, некои свински производи и мешаното мелено месо ќе бидат пониски.
Исто така, владата одлучи да усвои мерки за еднократна парична помош за пензионерите, невработените и примателите на детски додатоци.
"Пакетот мерки ќе ги заштити граѓаните, јавниот сектор и претприемачите. Ќе обезбедиме предвидлива есен и зима. Истовремено, испраќаме порака за неопходноста од заштеда на енергија", рече Пленковиќ.
Тој најави дека Владата, во рамките на принципот на праведност и солидарност, ќе предложи и специјален корпоративен данок кој ќе важи за претпријатијата кои ќе постигнат исклучително висок профит во услови на криза.
Пакетот мерки, според Владата, нема да влијае на зголемувањето на јавниот долг.
.webp){kind=icon}
