Американскиот претседател Доналд Трамп изјави дека разговорите со Иран за привремен мировен договор „ќе завршат добро“, иако воените сили на двете земји повторно се судрија во близина на Ормутскиот Теснец. Но, навикнати сме веќе Трамп едно да мисли, друго да зборува, а трето да прави.
А многу често неговите дела, или пак само зборови, прават хаос на светските пазари. Па дури и стари видеа со негов настап може да ги кренат акциите нагоре, како најновиот случај со технолошкиот гигант „ИБМ“, чиишто акции пораснаа за речиси 9 отсто откако повторно се појавило видео од тоа како Трамп го фали директорот на компанијата. Видеото првпат било објавено пред шест месеци, инаку.
Добро утро, ви пишува Игор Петровски од дигиталната редакција на „Блумберг Адрија“, ова се петте вести за почеток на денот:
Светско првенство 2026: Сè што треба да знаете пред почетокот на турнирот
На секои четири години светот во текот на еден летен месец застанува и се собира пред телевизиските екрани. Ниту оваа година нема да биде поинаку, бидејќи вниманието на светската јавност ќе биде насочено кон Северна Америка, каде што ќе се одржи првото Светско првенство во фудбал организирано во три различни држави. Станува збор за убедливо најгледаниот поединечен спортски настан во светот, чие финале го следат повеќе од 1,5 милијарда гледачи.
Светското првенство во САД, Канада и Мексико ќе се одржува од 11 јуни до 19 јули, кога двете најдобри репрезентации ќе се соочат на стадионот „Мет лајф“ во Њу Џерси. Според обложувачниците и фудбалските аналитичари, најголеми фаворити за титулата се Шпанија и Франција. Шпанската репрезентација пред две години го освои Европското првенство 2024, на кое Франција важеше за главен фаворит.
Од рекорден раст до отрезнување - зошто среброто падна за 40 проценти?
Среброто од јануарскиот рекорд до крајот на мај изгуби речиси 40 проценти од својата вредност, откако цената падна од околу 118 долари на околу 74 долари за унца. Овој стрмен пад го поставува прашањето дали пазарот конечно почна да се враќа во реалноста или е само прашање на одмор пред нов раст?
За разлика од златото, кое и покрај значителната корекција (-20 проценти) задржа поголемиот дел од својот претходен раст, среброто ја покажа својата карактеристика што на почетокот предизвика многумина да се сомневаат во неговиот потенцијал, а тоа е екстремната нестабилност.
Како се развива македонското индустриско производство во однос на земјите од регионот?
Индустриското производство во регионот Адрија се развиваше многу нерамномерно во последните години, а разликите меѓу земјите стануваат сè поизразени. Иако земјите од регионот делат слична географска и економска позадина, трендовите во рударството, производството и енергетиката покажуваат сосема различни насоки на развој.
Србија забележа силен раст на рударското производство и стабилност на индустрискиот сектор; Хрватска постепено ја зајакнува својата индустрија со повисока додадена вредност, додека Словенија се соочува со сериозни структурни проблеми во енергетскиот сектор. Босна и Херцеговина и Македонија генерално забележаа послаб раст и поголема нестабилност.
„Антропик“ поднесе доверлива пријава за ИПО во трката со „Опен еј-ај“
„Антропик“ (Anthropic PBC) доверливо достави нацрт-документација за јавна котација, потенцијално претркувајќи го долгогодишниот конкурент „Опен еј-ај“ (OpenAI) во трката за берзанско деби на Волстрит уште оваа есен.
Со поднесувањето во понеделник, „Антропик“ е подготвен потенцијално да го победи „Опен еј-ај“ на јавниот пазар, поставувајќи се себеси за привлекување поголемо внимание и капитал од поголем број инвеститори. Се вели дека самиот „Опен еј-ај“ подготвува свое доверливо поднесување за ИПО во наредните недели и се стреми кон јавно деби некаде на есен, објави „Блумберг“ во мај.
Битката за „Адико банка“ се разгорува, „НЛБ“ ја качи понудата на 33,5 евра по акција
Нова Љубљанска банка (НЛБ) објави дека ќе ја зголеми цената во својата доброволна јавна понуда за преземање на австриската „Адико банка“ (Addiko) на 33,5 евра по акција.
Новата цена е за 26,4 проценти повисока од понудата објавена од „Рајфајзен Банк Интернешнл“ (RBI) кон средината на мај, што дополнително ја заостри трката „НЛБ“ да ја преземе „Адико“. Словенечката банка вели дека нивната понуда им обезбедува поголема јасност и сигурност на акционерите бидејќи станува збор за едноставно плаќање во готово без условни или последователни дополнителни плаќања.
.webp){kind=icon}
