Оди ли светот во непосакувана насока на општа деструкција е прашање кое заслужува внимание откако рускиот претседател Владимир Путин предупреди дека неговите сили би можеле да ги нападнат „центрите за одлучување“ во украинската престолнина Киев со нови балистички ракети, како одмазда за нападите врз Русија со западни проектили. Ескалацијата на речиси тригодишната војна во Украина во пресрет на зимските месеци може да има сериозно негативно геополитичко и економско влијание, коешто нашиот регион веќе еднаш го почувствува преку неодамнешната енергетска криза и високата инфлација којашто следуваше потоа.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Пресметувавме колкави пензии ќе земаат сегашните работници во Македонија
Сите ние сме се обиделе да пресметаме колкава ќе ни биде пензијата. Растот на платите од последните години делумно го зголемува оптимизмот дека еден ден ќе имаме повеќе од сегашните пензионери. Читајќи ги јавно достапните документи, желбата за пресметка кај многумина брзо поминува поради тоа што станува збор за многу сложен процес на множење, собирање, делење. „Блумберг Адрија“ прави обид да го демистифицира системот за пресметка на пензиите. Обидот не е воопшто лесен иако добивме драгоцена помош од лицата во Фондот за пензиско, кои цел живот токму тоа го работат – ги пресметуваат туѓите пензии.
Првото нешто што го кажаа во оваа служба е дека вистинската пензија може да ја пресметаат само во Фондот затоа што станува збор за многу податоци. Освен платата и стажот, важни се и процентите, кои се различни во зависност од годините поминати на работа, како и од тоа дали работникот има или нема втор столб, а во пресметката влегуваат и варијабли што ПИОМ ги добива од Државниот завод за статистика на годишно ниво.
Што прават менаџерите кога мозокот им е „исклучен“?
Што грицкаат, каде и како вежбаат, кој им е омилен пијалак или каква храна имаат секогаш на менито. Овие и други секојдневни навики на менаџерите од земјава, регионот и светот го открива новата рубрика на „Блумберг бизнисвик Адрија“ (Bloomberg Businessweek Adria). Меѓудругото ќе можете да прочитате како ужива во слободното време Филомена Пљаковска Аспровска, главна извршна директорка на „КаСис АД“, единствениот процесор во Македонија за трансакции со картички „виза“ (Visa), „мастеркард“ (Mastercard) и „дајнерс“ (Diners) и сертифицирано биро за персонализација на платежни картички.
Што прави кога се одмора и која игра со пријателите најмногу ја релаксира открива Елена Младеновска-Јеленковиќ, извршна директорка на „М6 едукативен центар“. За Ведран Пушиќ, сопственик и извршен директор на „Инфо медиа груп“ (Info Media Group), која работи во 45 града во регионот Адрија и во Обединетите Арапски Емирати освен децата и семејството, издувен вентил и начин на полнење батерии му се трчањето, фудбалот, филмовите и книгите.
Дали златото ќе достигне рекордна вредност од 3.000 долари?
Цената на златото моментално изнесува 2.635 долари за унца од 31,1 грам. Цената на овој благороден метал во 2024 година порасна за 30 проценти и достигна врв кон крајот на октомври (2.787 долари). Потоа следуваше корекција на цената за пет проценти. „Тоа е техничка корекција по силниот раст, кој континуирано се продолжува од минатиот октомври“, објаснува аналитичарот Тилен Шарлах.
Може ли златото, сепак, да оди пониско? Шарлах очекува мала корекција на цената надолу, „што не значи и пресврт на трендот“. Технички, златото има ниво на поддршка од 2.400 долари и 2.250 долари по унца; дали тогаш цената би можела да скокне на рекордни три илјади? Пред да одговориме на тоа прашање, да провериме што сè влијае на движењето на цената на златото.
„Современ дом“ и „Скопски пазар“ го купија пакетот акции од „Македонијатурист“ за 7,3 милиони евра
„Современ дом“ и „Скопски пазар“ се компаниите кои на завчерашната јавна берзанска аукција на Македонската берза купија пакет од 44.449 обични акции издадени од „Македонијатурист“ АД Скопје за сума од 451,1 милиони денари (7,3 милиони евра), информираат за „Блумберг Адрија“ извори кои се добро запознаени со оваа проблематика, но сакаат да останат анонимни. Акциите се продадоа преку моделот „се или ништо“ по почетната цена од 10.150 денари по акција и со тоа двете компании се стекнаа со 9,83 проценти од основната главнина на друштвото.
Со оглед на тоа што „Современ дом“ е еден од мнозинските акционери во „Скопски пазар“ со најновата купопродажба на пакетот акции двете компании неофицијално го преземаат првото место на листата најголеми акционери во „Македонијатурист“, компанија во која извесен период има обиди за окрупнување на сопственичкиот капитал. Имено, неофицијално по последната купопродажба „Скопски пазар“ и „Современ дом“ заедно би требало да имаат најмалку 19,93 проценти од акциите во „Македoнијатурист“.
ВИ ги намали за половина загубите од измами во најголемата австралиска банка
Австралиската „Комонвелт банк“ (Commonwealth Bank of Australia) соопшти дека алатките за генеративна вештачка интелигенција (ВИ) ги намалиле загубите на клиентите од измами за половина. Исто така тие помогнале да се скрати процесот за одобрување хипотеки само на 10 минути. Технологијата помогна да се намалат измамите за 30 отсто, а нејзината примена за пораки со вештачка интелигенција го скрати времето на чекање на клиентите во центарот за повици за 40 отсто годинава, соопшти банката во четвртокот.
Вештачката интелигенција наскоро ќе може да одговори на околу 10 отсто од најтешките прашања на клиентите што моментално не можат да се решат со редовни компјутерски одговори, изјави заемодавецот. Воведувањето на вештачката интелигенција во најголемата банка во Австралија треба уште многу да се развива, бидејќи примената варира од итни проблеми до поширока организациска профитабилност. Измамите веќе беа во пад во Австралија бидејќи банките и технолошките компании вложија напори да ги обесхрабрат криминалците.
.webp){kind=icon}
