Против два ланци супермаркети се поведени прекршочни постапки. Комисијата за заштита на конкуренцијата (КЗК) информира дека двете друштва се активни во трговијата со земјоделски и прехранбени производи преку своја малопродажна мрежа и не ги почитувале одредбите од Законот за забрана на нефер трговски практики во синџирот на снабдување. Ако низ постапката се потврди дека го кршеле законот, ќе бидат изречени казни, соопшти КЗК.
Добро утро, oва се петте вести што се важни за почеток на денот.
Посочуваме сектори и компании од регионот Адрија со најголем потенцијал за раст
Одбранбениот сектор е во подем, а европските градежни компании би можеле значително да профитираат од реконструкцијата на Украина – моментално индексот (UBXERCON) кој ги следи компаниите кои би можеле да имаат корист од реконструкцијата е зголемен за 16 отсто од почетокот на оваа година.
Движењето МЕГА (Make Europe Great Again) се повеќе се споменува меѓу инвеститорите, што ја одразува зголемената доверба во европските берзи. Клучните причини за ова се очекуваните посилни фискални трошоци во ЕУ (дури и напуштање на критериумите од Мастрихт), зголемен ангажман со Украина и поголеми инвестиции во вештачката интелигенција и одбраната.
Под лупа: Како работеа лани компаниите од Македонската берза?
Минатата, 2024 година Македонската берза беше шампион во регионот, со најголем раст на индексот, од 65 проценти, што беше на самиот врв и меѓу берзите од целиот свет. Дури пет акции на македонски котирани компании се најдоа меѓу десетте со најголем раст во 2024 година во регионот Адрија.
Подобрената макроекономска состојба, скротената инфлација (иако сè уште постои страв од инфлациски притисоци), намалените каматни стапки, позитивните берзански движења глобално, кои имаат влијание и врз локалниот сентимент на инвеститорите, добрите резултати на котираните домашни компании и атрактивните дивиденди, особено во банкарскиот сектор, сето тоа придонесе МБИ10 да го надмине својот историски рекорден резултат од 2007 година.
Инвеститорите бегаат од зелената агенда, вишокот соларни модули го гуши пазарот
Соларната индустрија се соочува со прекумерна понуда, пад на цените и зголемен финансиски притисок, се вели во анализата на „БлумбергНЕФ“. Иако некои производители веќе го намалија производството, глобалните резерви продолжуваат да растат, а се очекува и дополнителното проширување на капацитетите надвор од Кина поради трговските ограничувања.
Според „БлумбергНЕФ“, производствениот капацитет на клучните компоненти во синџирот на снабдување со соларна индустрија достигна 1,2 теравати, надминувајќи ја очекуваната побарувачка до 2035 година.
ЕК најавува олеснување за емисии на CO₂ за автомобилите
Автомобилската индустрија излезе од кризата предизвикана од пандемијата, затворањето на економиите и проблемите со снабдувањето. Производителите на полуксузни модели полесно се приспособуваа. Но, откако се стабилизира пазарот, тие се соочија со нов предизвик – да го зголемат уделот на продадените електрични возила.
Производителите се соочуваат со високи казни до крајот на 2025 година, бидејќи просечната емисија на автомобилите продадени во Европа требаше да падне на 95 грама CO₂ на километар. Но, поради послабата продажба на електрични возила во 2024 година, кога нивниот раст забави, многу производители се соочуваат со закана од казни.
Актерска ѕвезда покажа како се заработува со вложување во фудбал
Холивудските ѕвезди Рајан Рејнолдс и Роб Мекелхени го купија Врексхем АФЦ (Wrexham AFC), мал велшки фудбалски клуб, за околу два милиона фунти (2,6 милиона долари) уште во 2021 година. Денес вреди околу сто милиони фунти.
Новата процена на вредноста следуваше откако семејството Алин од Њујорк неодамна купи речиси 15 проценти удел, според извори запознаени со ситуацијата. Алинови, кои го стекнале своето богатство во медицинската индустрија, купиле удели по проценета вредност што е околу 50 пати поголема од онаа кога актерите го презеле клубот, рекле извори што побарале да останат анонимни бидејќи деталите се приватни.
.webp){kind=icon}
