text size
Соединетите Американски Држави ги засилија критиките кон правилата на Европската Унија за намалување на емисиите на метан од увозот на нафта и гас, порачувајќи дека намалената понуда предизвикана од иранските напади врз катарските постројки значи дека блокот не може да си дозволи преголема строгост.
„Ако Европа сака да има пристапна енергија, ќе мора да ги намали регулаторните барања и ограничувањата што ги постави“, изјави Ендрју Паздер, американски амбасадор во ЕУ, за Блумберг ТВ.
„Тоа може да прерасне во многу сериозна енергетска криза ако Европа не реагира“, додаде тој, особено имајќи ги предвид неодамнешните случувања на Блискиот Исток.
Војната во Иран покажува колку Европа е ранлива на нестабилноста на цените. Иако не купува многу гас директно од Блискиот Исток, глобалното намалување на понудата значи поголема конкуренција со другите купувачи за достапните количини. Европската унија сега добива речиси две третини од течниот природен гас од САД, што на Вашингтон му дава предност во трговските разговори.
Катар соопшти дека поправките во комплексот Рас Лафан, најголемото постројка за течен природен гас во светот, би можеле да траат и до пет години откако беше оштетен во иранските напади.
Уште пред војната во Иран, правилата на ЕУ за намалување на емисиите на метан, силен стакленички гас, беа мета на остри критики од САД. Компании како „Ексон мобил“ (Exxon Mobil) тврдат дека тие правила се премногу строги за сложените синџири на снабдување во САД и дека ризикуваат да ги зголемат цените на нафтата и гасот што се испорачуваат во Европа.
Веќе следната година увозот на фосилни горива ќе мора да биде усогласен со правилата на ЕУ за следење, известување и верификација. До 2030 година ќе се воведуваат казни за увоз што го надминува прагот на интензитет на емисиите на метан. Европската комисија, извршното тело на Унијата, порача дека ќе примени „едноставен и прагматичен“ пристап за да не се загрози сигурноста на снабдувањето, но засега не ги промени прописите.
.webp){kind=icon}
