Колку ќе плати македонски газда ако ви ја покачи платата за 6.000 денари?

Просечната нето-плата во земјава во јули изнесувала 48.499 денари и номинално е за 7,1 отсто повисока од истиот месец лани, реално зголемувањето изнесува 4,7 отсто.

Во бруто-платата влегуваат придонесите за пензиско и здравствено осигурување и другите давачки што ги плаќаат работодавците. Тие изнесуваат вкупно 28 отсто. Се плаќа и данок на личен доход од 10 отсто, а трошокот на работодавецот се намалува за личното даночно ослободување, кое оваа година изнесува 10.932 денари.

Во услови кога повторно се отвора прашањето за зголемување на минималната плата, „Блумберг Адрија“ пресмета колку би го чинело работодавецот ако ја зголеми платата на еден работник за 100 евра.

Во пресметката зедовме три суми: минималната плата од 26.046 денари, просечната плата на државно за јули годинава (последен статистички податок) од 48.499 денари и највисоката плата исплатена нето-плата во земјава според последното статистичко соопштение од 89.532 денари.

Сто евра за работникот, 150 евра за газдата

Пресметката покажа дека благодарение на рамниот данок од 10 отсто за данокот на личен доход, како и истата стапка на социјални придонеси за сите работници, трошокот за работодавецот е ист сеедно колкава плата има работникот што добива зголемување.

За сите три плати (минималната, просечната и највисоката исплатена) трошокот за работодавецот што одлучил на работник да му ја зголеми платата за 6.000 денари се зголемува за околу 9.260 денари или околу 150 евра. Од нив, 100 евра завршуваат во џебот на работникот. Оваа сума е многу пониска споредено со некои земји од Европската Унија. Таму сопствениците на компаниите имаат многу повисоки дополнителни трошоци.

Но во европските земји пресметките не се едноставни како кај нас, а и давачките за работодавците се повисоки, што се должи на прогресивниот данок на личен доход. Колку е поголема платата толку е поголем трошокот за работодавецот, а поголеми се и приходите во државните буџети.

Словенечките работодавци најскапо го плаќаат зголемувањето на платите

Покачувањето на платата за 100 евра е најскапо во Словенија ако земјата се споредува со Германија, Австрија, Чешка и Полска, пишува словенечки „Финанце“.

Прогресивната стапка на данокот на личен доход во Словенија изнесува и 50 проценти за бруто-плати од над 9.000 евра, во зависност од олеснувањата. Социјалните придонеси кај вработените се пресметуваат без ограничување, па затоа кај многу високите плати дополнителната бруто-плата значително го зголемува трошокот на работодавецот.

Во Чешка системот на данок на доход е релативно едноставен: основната стапка на данокот на доход е 15 проценти, а за повисоките приходи, од над 6.000 евра бруто месечно, важи стапка од 23 проценти. Социјалните придонеси на вработениот и работодавецот се ограничени на околу 96 илјади евра годишно, односно во просек на околу 8.000 евра бруто месечно, додека здравственото осигурување го нема истото ограничување. Поради ниската највисока стапка на данокот на доход и ограничувањето на дел од придонесите, Чешка е многу конкурентна кај повисоките плати.

Полска има прогресивен данок на доход: 12 проценти до годишна даночна основа од околу 27.800 евра, односно околу 2.300 евра месечно и 32 проценти над тој праг. Станува збор за даночна основа, а не за бруто-плата, која е повисока од даночната основа и зависи од различни олеснувања, придонеси... Социјалните придонеси се ограничени за пензиските и инвалидските придонеси, на приближно 5.500 евра бруто-плата, но здравствениот придонес останува поврзан со приходот. Кај пониските плати системот е конкурентен, а кај повисоките побрзото преминување во класата од 32 проценти го зголемува оптоварувањето, пишува „Финанце“.

Германија има прогресивен данок на доход: највисоката маргинална стапка е приближно 45 проценти и таа почнува да се плаќа на даночни основи повисоки од околу 23 илјади евра месечно. Социјалните придонеси имаат значајни горни граници на основицата, па затоа кај повисоките плати дополнителниот бруто-износ помалку го зголемува трошокот за труд.

Австрија има прогресивен данок на доход, со највисока стапка од 55 проценти за највисоките приходи, над еден милион евра годишно. Социјалните придонеси се ограничени со месечна горна основица, пишува словенечкиот медиум.