Гевгеличанец и oхриѓанец лани заработиле над 4 милиони евра

Дете од четири години е најмладиот милионер во Македонија. Милионскиот доход го остварило од дивиденда. Податоците на Управата  ја јавни приходи покажуваат дека највозрасниот милионер има 97 години, а приходите ги остварувал од пензија и други извори.

За лани Управата обработи годишни даночни пријави за околу 863 илјади граѓани, со вкупен бруто-доход од близу 10 милијарди евра (612,9 милијарди денари). За овие пари е пресметан данок на личен доход од околу 647 милиони евра (39,8 милијарди денари). Вкупниот бруто-доход и пресметаниот данок се повисоки за околу 14 отсто во споредба со 2024 година, а  бројот на граѓани што оствариле доход кој подлежи на даночење е зголемен за 82.702 лица.

Најголем број граѓани, 638 илјади граѓани, односно приближно две третини од даночните обврзници, имаат годишен бруто-доход до околу 16.000 евра (од 100 илјади до еден милион денари). Тие остваруваат 55 отсто од вкупниот бруто-доход.

Од друга страна, 16 отсто од обврзниците, со доход до 160.000 евра (од еден до десет милиони денари), остваруваат 39 отсто од вкупниот доход.

Во 2025 година, 31 граѓанин остварил годишен доход од над 1,6 милиони евра (над 100 милиони денари), со вкупен износ од 4,973 милијарди денари. Во 2024 година, во оваа група имало 42 граѓани со вкупен доход од 6,753 милијарди денари.

„Значи, во највисокиот доходовен праг има намалување и на бројот на лица и на вкупниот остварен доход“, велат од УЈП.

Околу две третини од вкупниот бруто-доход во 2025 година произлегуваат од плати. Пензиите учествуваат со 9,5 отсто, а другите лични примања од работа со 8,2 отсто.

Доходот од земјоделски производи и од дивиденди и друг доход од капитал учествува со нешто помалку од 5 отсто, додека добивките од игрите на среќа, закупнините и другите доходи учествуваат со околу 2 отсто.

„Плата оствариле околу 596 илјади граѓани, доход од самостојна дејност оствариле 15 илјади, а од продажба на сопствени земјоделски производи – 49 илјади граѓани. Дивиденди се исплатени на 33 илјади лица, а 145 илјади оствариле друг доход, категорија во која влегуваат и доходи од продажба на цврст отпад, електронска трговија и други оданочиви извори. Околу 33 илјади лица оствариле доход од закупнини, а 114 илјади биле добитници од игри на среќа. Капиталните добивки се ретки – две илјади лица, но неколку продажби на удели и хартии од вредност носат стотици милиони“, велат од УЈП.

Регионалните податоци, исто така, откриваат важни разлики. Скопје учествува со 36 отсто во вкупниот број годишни даночни пријави, но со 43 отсто во остварениот бруто-доход. Просечниот годишен доход по пријава во Скопје изнесува 846 илјади денари и е највисок меѓу регионите.

Во битолскиот регион помал број граѓани оствариле доход што се даночи во однос на Штип и Прилеп. Но просечните приходи во Битола се поголеми отколку во Штип и Прилеп. Најмалку граѓани што пријавиле приход што се даночи има во тетовскиот и струмичкиот регион.

Највисоката годишна бруто-плата изнесува 139,1 милион денари (2,2 милиони евра), додека највисоката дивиденда е 252,6 милиони денари (4,1 милиони евра), а највисоката капитална добивка е 164,2 милиони денари (2,7 милиони евра).

„Кога станува збор за вкупен доход од сите извори, највисокиот доход во 2025 година изнесува 257,5 милиони денари (4,186 милиони евра) и го остварил граѓанин од Гевгелија преку плата, дивиденда и друг доход. Следува граѓанин од Охрид со 254,4 милиони денари (4,136 милиони евра)“, велат од УЈП.