Инфлацијата во Франција забрза до највисокото ниво во повеќе од две години

Инфлацијата во Франција забрза до највисокото ниво во последните повеќе од две години, одржувајќи го притисокот врз Европската централна банка (ЕЦБ) да продолжи со зголемување на каматните стапки.

Инфлацијата во втората по големина економија во еврозоната изнесуваше 3,4 проценти во септември, што претставува пораст од 2,6 проценти измерени во август, соопшти во средата статистичката агенција Инси (Insee). Оваа бројка е повисока од 3,2-те проценти предвидени во анкетата на „Блумберг“ меѓу аналитичарите.

Наглиот раст на трошоците за нафта и природен гас, предизвикан од седуммесечниот конфликт на Блискиот Исток, сè уште влијае врз европската економија, принудувајќи ја ЕЦБ да ја заостри монетарната политика, а владите да им помагаат на компаниите и домаќинствата кои се соочуваат со зголемени сметки за енергија.

Шпанија во вторникот пријави најголем раст на цените во последните повеќе од три години, со стапка од 5 проценти, што е повеќе од двојно над целта на ЕЦБ од 2 процента. Се очекува податоците за Италија и Германија, кои треба да бидат објавени подоцна во средата, да покажат стапки повисоки од 3 проценти. Увозните цени во Германија во август го забележаа најголемиот пораст во речиси четири години.

Евростат во петок ќе ги објави податоците за инфлацијата за еврозоната (составена од 21 земја) во целина. Економистите проценуваат дека таа достигнала тригодишен максимум од 3,7 проценти.

ЕЦБ досега двапати ги зголеми трошоците за задолжување, достигнувајќи ниво од 2,5 проценти, а пазарите веќе калкулираат со уште речиси четири зголемувања од по четвртина процентен поен во текот на следната година. Претседателката Кристин Лагард во понеделникот се заложи за „одмерен одговор, соодветен за одржување на инфлацијата под контрола“. Сепак, таа предупреди дека глобалната распродажба на обврзници ќе влијае на ограничување на цените и на растот.

 

Податоците од Франција покажаа дека најголемиот дел од притисокот сè уште доаѓа од трошоците за енергија, кои во септември пораснале за 21,2 проценти во споредба со претходната година. Ова се совпаѓа со ставовите на креаторите на политиките во ЕЦБ, кои велат дека ефектите од „вториот круг“ (прелевањето на инфлацијата во други сектори) сè уште не се појавени.

Сепак, инфлацијата во францускиот сектор на услуги забрза од 1,9 на 2,2 проценти, додека кај храната се зголеми од 1,1 на 1,5 проценти, како резултат на скокот на цените на свежите земјоделски производи. Во Франција е забележан побавен раст на цените во споредба со другите европски земји, делумно поради тоа што нуклеарната енергија обезбедува голем дел од енергетските потреби, како и поради економијата која беше забавена од топлотните бранови и неизвесноста поврзана со политиката и буџетот.

Посебен извештај на националниот институт за статистика Инси, објавен во средата, покажа дека потрошувачката на домаќинствата во август опаднала за 0,5 проценти во однос на претходниот месец, како резултат на намалените трошоци за храна и енергија. Аналитичарите анкетирани од „Блумберг“ очекуваа стагнација.