.webp){kind=icon}
Аналитичкиот тим на „Блумберг Адрија“ очекува Европската централна банка (ЕЦБ) да ги зголеми каматните стапки за уште 75 базични поени во најмалку уште два чекора, изјави главниот аналитичар Андреј Кнез.
Тој објасни дека, освен одлуката на ЕЦБ да ги зголеми клучните стапки за 75 поени, вчерашниот ден го обележиле и резултатите на компаниите и растот на американскиот БДП, па на крајот на денот некои берзански индекси пораснале, некои паднале, а односот евро - долар се спуштил.
„Вчера имаше толку многу измешани пораки што мислам дека пазарите сè уште размислуваат како да го протолкуваат тоа“, рече Кнез.
Тој додаде дека, според очекувањата, инфлацијата во еврозоната би можела да се врати на посакуваните два отсто дури во 2025 година.
Централните банки, како што потсетува Кнез, не ја имаат само улогата на монетарната политика туку мора да ја одржуваат стабилноста на финансискиот систем.
„Инструмент што би бил особено важен е квантитативното заострување, односно повлекувањето на вишокот ликвидност што се создаде со печатење пари. ЕЦБ испраќа сигнал дека за ова ќе разговара дури во декември. Тоа е една од причините зошто немаше некаков значаен развој на пазарот вчера“, посочи Кнез.
Според него, ЕЦБ „е помирена со рецесијата“.
