Европската централна банка (ЕЦБ) ќе ги зголеми референтните каматни стапки уште двапати за да се справи со невидената инфлација, а следното зголемување ќе биде половина процентен поен, предвидуваат економистите.
Цените на задолжувањето ќе пораснат со исто темпо и по состанокот во февруари, што значи дека каматната стапка на депозитите ќе достигне 2,5 отсто на својот врв, покажуваат резултатите од истражувањето на „Блумберг“. Економистите предвидуваат и дека ЕЦБ во следниот квартал ќе почне да ја намалува понудата на пари, која за време на кризното откупување обврзници достигна износи изразени во илјади милијарди евра.
И покрај најагресивното монетарно затегнување во историјата на еврото, повеќе од половина од анкетираните велат дека ЕЦБ заостанува во борбата против инфлацијата, која сега е точно пет пати повисока од посакуваната цел од два отсто. Федералните резерви, сепак, сигнализираат дека ќе има забавување на стапката на зголемување на каматните стапки.
Упорна инфлација
Додека растот на цените во еврозоната во ноември забави за првпат од средината на 2021 година, тие ќе останат покачени некое време поради енергетската криза предизвикана од војната во Украина.
„Инфлациските притисоци ќе останат, а се очекува дека ЕЦБ ќе мора да го намали интензитетот на зголемувањето на каматните стапки“, вели Улрике Кастенс, економистка во компанијата ДВС (DWS International GmbH). „Најголемиот предизвик за ЕЦБ ќе биде да го убеди пазарот дека навистина сака да се бори против инфлацијата на веродостоен начин“, додаде таа.
Донесувањето одлуки ќе стане уште понапорен процес кога на сцена ќе стапи намалувањето на паричната маса од речиси пет илјади милијарди евра во обврзници - процес познат како квантитативно затегнување.
Девет од десет економисти предвидуваат дека квантитативното затегнување ќе се случи преку допуштање обврзниците да созреат, а не преку активна продажба.
Почетокот на овој процес ги зголемува шансите за конфликт во Советот на гувернери, чии 25 члена досега успеаја да избегнат големи конфронтации при пресвртот во монетарната политика. Исклучително неизвесната иднина и високата инфлација претставуваат дополнителни пречки.
Потрошувачите сигнализираат дека претставниците на ЕЦБ не направиле доволно досега. Нивните очекувања за инфлација за следната година се зголемија на 5,4 отсто во најновото истражување. Очекувањата за следните три години останаа непроменети на три проценти.
Испитаниците во истражувањето на „Блумберг“ очекуваат инфлацијата во еврозоната да биде 6,1 отсто во 2023 година и 2,2 отсто во 2024 година. Во зимскиот период се очекува негативен економски раст, додека бруто-домашниот производ на еврозоната ќе се зголемува од вториот квартал.
Прочитајте повеќе за предвидувањата на „Блумберг економикс“ на следниов линк.
.webp){kind=icon}
