ЕЦБ со зголемување од половина поен и квантитативно затегнување по март

Европската централна банка го забави темпото на зголемување на каматните стапки, а од друга страна ги прошири напорите да ја намали двоцифрената инфлација со одлуката од март да го намалува своето портфолио на обврзници од 5 илјади милијарди евра.

По последователните зголемувања од 75 базични поени, ЕЦБ во четвртокот ја подигна депозитната стапка за половина поен, на два отсто, што одговара на очекувањата на економистите.

„Управниот совет оценува дека каматните стапки сепак ќе мора значително да растат со стабилно темпо за да достигнат нивоа што се доволно рестриктивни за да се обезбеди навремено враќање на инфлацијата до среднорочната цел од два отсто“, се вели во соопштението на ЕЦБ.

Денешното соопштение следува откако растот на цените во еврозоната ублажи во ноември, за првпат во последната година и половина и доаѓа во период кога блокот веројатно веќе е во рецесија.

Депозитната каматна стапка од два отсто генерално се смета за ниво што ниту ја стимулира ниту ја ограничува економијата на еврозоната.

 

 

Евидентно е дека и другите централни банки полека го забавуваат темпото на зголемување, па во средата американската ФЕД ја зголеми каматната стапка за 50 базични поени наместо досегашните 75, а денеска истиот чекор го презеде и Банката на Англија.

Официјалните лица ги истакнаа и плановите за квантитативното затегнување, односно главните принципи на програмата за намалување на портфолиото на обврзници во вредност од пет илјади милијарди евра, што ЕЦБ го акумулираше преку долгорочната програма за купување обврзници. Програмата предвидува намалување на финансирањата во просек за 15 милијарди евра по месец во второто тримесечје, а темпото допрва ќе се одреди.

Еврото го намали претходниот пад и обврзниците паднаа. Единствената валута е за околу 0,4 отсто пониска наспроти доларот на 1,064 долар, откако падна дури за 0,7 отсто пред соопштението. Европските државни обврзници се слизнаа, а италијанскиот долг е слаб.

Свежите проекции, објавени денеска, ќе помогнат да се утврди како да се продолжи понатаму. Со оглед на тоа што руската војна во Украина сè уште беснее, прогнозите посочуваат на идните предизвици што вклучуваат економски раст од само 0,5 отсто во 2023 година. Во меѓувреме, прогнозите за инфлацијата се зголемени за следните две години. Се очекува дека ќе биде над целта од два отсто и во 2025 година.

Прогнози на ЕЦБ за инфлацијата и економскиот раст за оваа и за следните три години / Bloomberg Mercury

Аналитичарите сметаат дека ЕЦБ следната година би можела да ја зголеми каматната стапка до 2,5 отсто, додека на пазарот има мислења дека врвот би бил на 2,9 отсто.

Планираното намалување на уделот во обврзниците додава нов елемент во процесот на преговори во Управниот совет, кој наскоро ќе има 26 члена и можеби ќе помогне да се добие поддршка за помало зголемување од страна на поагресивните функционери во панелот.

Неколкумина се залагаат за ран почеток на квантитативното затегнување, додека нивните порезервирани колеги се загрижени за влошувањето на економската слика и им даваат предност на попретпазливи дејства во однос на стапките.

Во моментов нема коментари за веста. Биди прв да коментира...

Остави коментар