Бурата конечно ја принуди ЕЦБ да одлучува за каматите состанок по состанок

Требаше да избувнат финансиски превирања на светско ниво за Европската централна банка (ЕЦБ) конечно да го прифати пристапот „состанок по состанок“, за кој тврди дека го следи со месеци.

Официјалните лица ги исфрлија овие многупати повторувани зборови од својата изјава во четвртокот, откако испорачаа зголемување на каматните стапки за половина поен, што тие го најавија на последниот состанок пред шест недели, а го навестуваа дури и претходно.

Сега тие јасно ставија до знаење дека ги напуштаат таквите најави во однос на идните потези, при што порачаа дека будно ќе ги „следат податоците“ пред секоја натамошна одлука. 

Тоа ќе ѝ даде на ЕЦБ поголема флексибилност додека се движи низ сè покомпликувани услови - иако со ваквиот потег инвеститорите ќе останат со помалку показатели за тоа во која насока ќе се движи монетарната политика.

Промената претставува значаен пресврт откако несогласувањата за фразата „состанок по состанок“ ескалираа јавно само неколку дена пред да се промени светот, бидејќи банката „Силикон валеј“ (СВБ) пропадна, а „Кредит Суис“ (Credit Suisse Group AG) побара сламка за спас од Швајцарската народна банка.

Поранешниот главен економист на ЕЦБ, Питер Прает, вели дека функционерите ја направиле вистинската работа со тоа што не му кажале на пазарот што ќе направат следно.

„Ќе видиме“, изјави тој за телевизијата „Блумберг“. „Ова е навистина 'состанок по состанок'“.

Бидејќи базичната инфлација достигна ново највисоко ниво во февруари, јастребите на ЕЦБ почнаа да мапираат потенцијални потези за втората половина од годината. Тоа го прошири значењето на „состанок по состанок“, и покрај тоа што фразата е клучна порака уште од почетокот на зголемувањето на стапките во јули.

Конечно, откако Австриецот Роберт Холцман почна да шпекулира дека следуваат вкупно четири зголемувања за половина поен, трпението на гувернерот на Банката на Италија, Игнацио Виско, пукна пред нешто повеќе од една недела.

ЕЦБ ги намали прогнозите за вкупната инфлација, но ја зголеми процената за базичната во 2023 година

Bloomberg

Критикувајќи ја очигледната употреба на долгорочни најави во спротивност на договорениот пристап на ЕЦБ, тој инсистираше на тоа дека „неизвесноста е многу висока“ - оправдување што се покажа како неверојатно прецизно.

Претседателката Кристин Лагард сега е на непозната територија: бидејќи толку долго е чест извор на меѓународни превирања поради нејзината дефицитарна архитектура, еврозоната во моментов не е проблем.

Официјалните лица инсистираат дека банкарскиот систем што го надгледува ЕЦБ е со пристојно здравје, иако некои поединечни институции може да бидат ранливи на покачените стапки. Но настаните во САД и Швајцарија ги принудуваат креаторите на политиката во Франкфурт да ѝ дадат приоритет на финансиската стабилност дури и кога инфлацискиот шок е далеку од под контрола.

Затоа ЕЦБ сега дојде во ситуација да следи потег што на прв поглед е агресивен - зголемување на стапката на депозитите за половина поен, на највисоко ниво од 2008 година.

Прает смета дека колебливиот пристап од четвртокот е правилна одлука - ако не се реализираше зголемувањето што постојано го сигнализираше ЕЦБ, тоа ќе испратеше порака за вознемиреност, што ризикува да ги исплаши инвеститорите; а најава за понатамошното постапување еднакво не би било мудро.

Исходот може ефективно да значи мала победа за гулабите во ЕЦБ како што е Виско, иако тоа е исто така само увертира за идните расправии околу тоа што да се прави.

Она што е сигурно е дека резултатите од преговорите што доведоа до непријатен период на очигледно контрадикторни пораки - одлуките да се „базираат на податоците“, работите да се прават „состанок по состанок“, додека истовремено се најавуваат конкретни потези неколку недели пред нивното случување - се чини дека сега се зад нас.

„Тие го направија единственото нешто што можеа да го направат: да ги испорачаат 50-те базични поени, затоа што се врзаа за овој неумесен шаблон за претходно објавување“, изјави главниот економист на групацијата „Уникредит“, Ерик Нилсен, за телевизијата „Блумберг“. „Многу сум среќен што слушнав дека повеќе нема да го прават тоа“.

Во моментов нема коментари за веста. Биди прв да коментира...

Остави коментар