Компаниите во Обединетото Кралство забележаа најбрз раст во една година бидејќи трошењето на одмори и забава поттикна посилен раст од очекуваното.
Композитниот индекс на менаџерите за набавки во април скокна на 53,9 од 52,2, колку што беше претходниот месец, по забрзувањето во услужниот сектор, објави денеска „Ес енд пи глобал“ (S&P Global). Економистите очекуваа да нема промени. Сега е над прагот од 50, што сигнализира проширување веќе три месеци.
Податоците укажуваат на тоа дека британската економија е отпорна на спротивставените ветрови, вклучувајќи повисоки каматни стапки и намалена потрошувачка моќ. Тоа ќе го зајакне ставот на Банката на Англија да продолжи да ги зголемува каматните стапки за да ја стави инфлацијата под контрола.
„Економијата како целина не само што покажува охрабрувачка издржливост туку доби на интензитетот на раст“, рече Крис Вилијамсон, главен деловен економист во „Ес енд пи глобал“ (S&P Global Market Intelligence). Тој предвидува дека 12-то по ред зголемување на стапката на следниот состанок на Банката на Англија на 11 мај е завршена работа и може да значи дека се потребни дополнителни зголемувања.
Од „Ес енд пи глобал“ соопштија дека растот во услужниот сектор достигна највисоко ниво за една година и доведе до пораст на вкупната бројка на новоотворени работни места на највисоко ниво во последните шест месеци. Растот на новите нарачки во услужниот сектор скокна на 13-месечен максимум, поттикнат од трошоците за патување, одмор и забава. Меѓутоа, производствениот сектор во април се лизна подлабоко, дури и кога синџирите на снабдување се подобрија и притисокот на фабричките трошоци се намали. Индексот PMI во производството падна на 46,6, што е најниско ниво во последните четири месеци.
„Инфлациските притисоци во производството во меѓувреме продолжија да се намалуваат, но ценовните притисоци се зголемија кај услугите по повторното зголемување на побарувачката“, рече Вилијамсон.
.webp){kind=icon}
