Нот: ЕЦБ да продолжи со раст на каматите среде превисока базична инфлација

Европската централна банка (ЕЦБ) треба да продолжи да ги зголемува каматните стапки во услови на превисока базична стапка на инфлација, рече членот на Управниот совет, Клас Нот.

„ЕЦБ ќе мора да ги зголеми трошоците за позајмување сè додека не се ублажи основната инфлација. Нашиот вистински проблем во моментов е што базичната инфлација е сè уште превисока“, рече Нот во денешното интервју за ТВ-емисијата „Бујтенхоф“.

Европската централна банка во четвртокот ја зголеми депозитната стапка за четвртина поен, на 3,25 проценти, по три потези со двојно поголемо покачување. Претседателката на ЕЦБ, Кристин Лагард, исто така сигнализираше дека најверојатно ќе има уште зголемувања на каматните стапки.
„Имаме повеќе терен за покривање и не паузираме“, рече таа.

Потрошувачките цени во еврозоната, од кои се исклучени нестабилните ставки како гориво и храна, во април се зголемија за 5,6 проценти на годишно ниво, што е само за нијанса пониско од рекордните 5,7 проценти во март.

Холандскиот централен банкар, кој е меѓу јастребовските функционери во регионот, рече дека ЕЦБ може да ја достигне целта за инфлација од два отсто некаде во 2025 година.

„Но нашата политика функционира со одредени задоцнувања, така што најголемите влијанија од она што го направивме досега сè уште не се во видокруг. Затоа сметавме дека е донекаде одговорно, а тоа беше и моја заложба на состанокот, да се направи тој чекор за намалување на темпото на покачување од половина на четвртина процентен поен“, рече Нот.

Во моментов нема коментари за веста. Биди прв да коментира...

Остави коментар