Европската централна банка (ЕЦБ) е пред тешка одлука за тоа кога да престане да ги зголемува каматните стапки, бидејќи е тешко да се измери колкаво е влијанието на монетарното затегнување, вели Клер Ломбардели, главна економистка на Организацијата за економска соработка и развој (ОЕЦД).
„Со последниот циклус на зголемување на трошоците за задолжување, особено заемите со фиксна стапка што направија структурни промени, се отежнува проценувањето на ефектите што се пренесуваат во реалната економија“, вели Ломбардели за телевизијата „Блумберг“. Овие фактори им даваат нереална слика на централните банкари. „Преносот на монетарната политика е многу несигурен. Тешко е да се процени влијанието и кога тоа влијание ќе ја постигне максималната точка“, рече Ломбардели.
Според неа, предизвикот е особено голем во Европа, бидејќи и кога стапката на инфлација се намалува, сè уште постојат големи притисоци врз основните цени. Ова е клучна точка за расправа за креаторите на монетарната политика, кои веќе сигнализираат повторен раст на референтната каматна стапка до крајот на јули.
Минатата недела потпретседателот на Европската централна банка изјави дека повеќето показатели за основните цени почнуваат да омекнуваат. Претседателот на „Бундесбанк“(Bundesbank), Јоагим Нагел, од друга страна потенцира дека основната стапка на инфлација останува извор на загриженост. Растот на основните цени се забрза во јуни на 5,4 отсто, додека главниот мерач забави на 5,5 отсто.
„Европа се соочува со навистина тежок предизвик со инфлацијата, построгите мерки на монетарната политика се непопуларни, но тие се потребни за да се истисне инфлацијата од системот, бидејќи таа им штети на луѓето“, рече Ломбардели.
.webp){kind=icon}
