Политиката на Европската централна банка ќе помогне да се скроти инфлацијата, смета претседателката Кристин Лагард.
„Сакаме да ја намалиме инфлацијата на два отсто и ќе успееме“, рече Лагард во интервјуто за „Ла трибун Диманш“ (La Tribune Dimanche), додавајќи дека инфлаторната спирала „мора апсолутно да се избегне“.
Минатиот месец ЕЦБ ги зголеми трошоците за задолжување десетти пат по ред за да ја доведе стапката на депозити на рекордни четири проценти. Повеќето централни банкари посочија дека одржувањето на ова ниво некое време треба да биде доволно за да се врати инфлацијата на целта, иако таканаречените „јастреби“ предупредуваат дека можеби ќе бидат потребни повеќе зголемувања на каматните стапки.
„Клучните каматни стапки на ЕЦБ достигнаа нивоа што, доколку се задржат доволно долго, несомнено ќе придонесат инфлацијата што поскоро да се доближи до нашата цел“, рече таа, повторувајќи го ставот на институцијата што ја предводи.
Циклусот на зголемување на каматните стапки на централната банка влијаеше врз економијата, при што бруто домашниот производ едвај растеше оваа година, иако Лагард истакна дека нејзината цел не била да доведе до рецесија.
Таа рече дека „не е песимистична“ за краткорочните изгледи за растот, иако призна дека Германија е фактор што влијае на европските проекции. Инфлацијата продолжува, но забавува, а во исто време растот станува послаб, рече таа.
„Затоа Меѓународниот монетарен фонд ги ревидираше своите прогнози надолу низ целиот свет, освен во САД“, рече Лагард. ММФ треба да ги објави новите економски проекции во вторник пред својот годишен состанок.
.webp){kind=icon}
