Забавувањето на инфлацијата „секако е наша прогноза“, посочи претседателката на Европската централна банка (ЕЦБ), Кристин Лагард, додавајќи дека институцијата е решена да го врати растот на цените на стандардниот просек.
„Решени сме да ја намалиме инфлацијата на 2 отсто. Според нашите проекции, тоа ниво ќе го достигнеме во 2025 година“, изјави Лагард за грчкиот весник „Катимерини“.
Таа нагласи дека не е загрижена за политичките импликации на напорите на централната банка, кои беа критикувани од некои европски влади, загрижени дека повисоките каматни стапки ќе го задушат економскиот раст.
„Нашиот мандат е да обезбедиме стабилност на цените и тоа е најдобриот придонес што можеме да го дадеме за социјалниот мир и општеството, особено за најранливите членови“, рече таа.
ЕЦБ ја прекина кампањата без преседан за зголемување на каматните стапки, во обид да ја врати контролата врз инфлацијата. Официјалните лица сигнализираа дека трошоците за задолжување ќе останат високи, иако слабеењето на економијата на еврозоната сигнализира дека кратењата наскоро ќе станат неопходни.
Лагард рече дека клучните показатели за ефикасноста на економската и финансиската состојба на Грција покажуваат „подобрувања во сите сегменти“.
Во октомври, „Стандард енд пурс Рејтингс“ го подигна кредитниот рејтинг на Грција на инвестициска оценка, што е прв ваков потег на еден од трите најголеми оценувачи откако земјата беше потресена од должничка криза пред повеќе од една деценија.
„Разбирам дека се планираат повеќе реформи, но, сè на сè, резултатите од напорите на земјата се импресивни“, заклучи Лагард.
.webp){kind=icon}
