.webp){kind=icon}
Eвропската централна банка (ЕЦБ) се очекува да ги намали каматните стапки во одреден момент во 2024 година. „Намалувањето ќе дојде откако ЕЦБ ќе се увери дека тие доволно долго се на високо ниво од четири проценти, за да можат да ја ограничат инфлацијата“, изјави членот на Советот на гувернери на Европската централна банка (ЕЦБ), Франсоа Вилерој де Галхау.
„Помеѓу зголемувањето на каматните стапки, кое, доколку нема изненадувања, заврши, и нивното намалување постои плато“, изјави Вилерој во вторникот за радиото „Франс интер“.
Гувернерот на Банката на Франција изјави дека ЕЦБ ќе ги намали каматните стапки врз основа на податоците и дека тоа нема да зависи од каков било потег на Федералните резерви на САД (Фед).
„Инсистирам на трпение и рамнотежа, бидејќи ако прерано ги намалиме каматните стапки, ризикуваме враќање на инфлацијата“, рече тој.
Проекции за економски раст на Франција
Bloomberg
Неговите коментари доаѓаат откако ЕЦБ минатата недела одлучи да ги задржи трошоците за задолжување непроменети. Од соопштението е отстранет делот каде што се тврди дека „инфлацијата предолго ќе остане превисока“.
Меѓутоа, претседателката на банката Кристин Лагард рече дека за намалување на стапките во моментов не се ни разговара и предупреди дека борбата против инфлацијата, која почна нагло да се забрзува во 2022 година, не е завршена.
Претходно во текот на денот Банката на Франција објави нови економски проекции, според кои инфлацијата ќе забави до 1,8 отсто во 2025 година.
Прочитајте повеќе: Банката на Франција ја намали проекцијата на инфлацијата за 2024 и 2025 година
Проекциите за економски раст се помалку оптимистички, па се очекува раст од 0,9 отсто за 2024 година, многу помалку од предвидувањата на Владата дека БДП следната година ќе порасне за 1,4 отсто.
