Следната година Германија ќе издаде помалку обврзници од годинава (а најмалку од 2020 година), бидејќи владата треба да го намали обемот на мерките наменети за закрепнување на економијата од пандемијата на ковид-19 и енергетската криза.
Владата планира да издаде должнички хартии во вредност од околу 440 милијарди евра, се наведува во соопштението објавено во вторникот од Сојузната управа за јавен долг. Последната година беше рекордна, во која беше издаден долг вреден околу 500 милијарди евра.
Планот вклучува продажба на долгорочни обврзници во вредност од 248 милијарди евра, а ќе бидат издадени и краткорочни записи во вредност од 165 милијарди евра. Помеѓу 17 и 19 милијарди евра ќе се соберат преку емисија на зелени обврзници, соопшти Управата за јавен долг.
Германските обврзници пораснаа по објавата на соопштението, при што приносот на 10-годишната обврзница падна за околу пет базични поени, на 2,03 отсто. Тоа е блиску до мартовскиот минимум во однос на каматата.
Вкупен обем на емисии на обврзници од германските сојузни власти
Bloomberg
Обемот на задолжување на германската сојузна влада расте од 2020 година, а намерата на државата беше да ја зголеми потрошувачката по пандемијата и да му помогне на населението да се справи со растот на цените на енергијата по руската инвазија на Украина.
Откако тие кризи стивнаа, министерот за финансии Кристијан Линднер, претседател на Слободните демократи што се залагаат за рестриктивна фискална политика, првично инсистираше германската трипартиска коалиција да ја врати уставната граница за ново задолжување годинава.
Сепак, минатомесечната неочекувана пресуда на највисокиот национален суд, со која се ограничи користењето вонбуџетски средства, го врати планирањето на буџетот на почеток. Така, Линднер беше спречен да го примени механизмот познат како „должничка кочница“ четврта година по ред.
Владејачката коалиција ја остави отворена и можноста тоа повторно да се случи следната година.
.webp){kind=icon}
