Побарувачката за кредити во еврозоната е на дното, се очекува закрепнување

Побарувачката за кредити во еврозоната најверојатно го допре дното по падот подолг од една година, во услови на раст на каматните стапки и тешкотии за економијата, објави во вторникот Европската централна банка (ЕЦБ).

Според кварталното истражување на ЕЦБ, податоците покажуваат дека апетитот за кредити кај компаниите и кај граѓаните бил помал во последниот квартал од минатата година отколку во претходниот квартал.

„За првпат од почетокот на 2022 година, банките очекуваат мал нето-раст на побарувачката за кредити за бизниси и поединци во првото тримесечје на 2024 година“, соопшти ЕЦБ.

Сепак, банките продолжуваат да ги заоструваат условите за кредитирање, иако со малку поумерено темпо, кое треба да продолжи да се олабавува во првите месеци од годинава, покажуваат резултатите од истражувањето.

Функционерите на ЕЦБ проценуваат уште колку преостанува да се почувствува невиденото зголемување на каматните стапки, а кредитирањето на банките е еден од клучните канали преку кои се прават напори за ублажување на економската активност и враќање на инфлацијата на посакуваните два отсто. Притоа, целта е мекото приземјување да не се претвори во забележлива рецесија.

Банките од еврозоната воведоа построги услови за кредитирање Bloomberg Mercury

„Во различни категории, падот на побарувачката беше поттикнат од општото ниво на каматни стапки. Пониските фиксни инвестиции ја намалија побарувачката на заеми на компаниите, а намалената доверба на потрошувачите и изгледите на пазарот на недвижности ја намалија побарувачката на кредити за домаќинствата“, соопшти ЕЦБ.

ЕЦБ го спроведува ова квартално истражување од 2003 година, а овој пат беше објавено два дена пред новиот состанок за монетарната политика на централната банка на еврозоната. Се очекува трета средба по ред каматните стапки да останат непроменети на четири проценти.

Според Берт Колин, висок економист во ИНГ (ING Bank), резултатите од истражувањето сугерираат дека монетарното олеснување ќе се случи годинава.

„Анкетата потврдува дека монетарната трансмисија останува силна и дека економската активност ќе остане придушена поради монетарното затегнување. Ова го отвора патот за првите чекори за намалување на каматните стапки подоцна во текот на годината“, вели Колин.

Во моментов нема коментари за веста. Биди прв да коментира...

Остави коментар