Франција апелира граѓаните да ги исклучуваат светилките по дома

Француската влада ги повика граѓаните да ги исклучуваат светилките, да исклучат Wi-Fi и да ги намалат клима уредите за да штедат енергија, бидејќи војната во Украина ги зголемува трошоците за електрична енергија и се заканува да го наруши снабдувањето.

Овонеделниот топлотен бран кој донесе рекордни температури и шумски пожари, исто така е остар потсетник на ефектите од климатските промени и потребата да се користат помалку фосилни горива, изјави денеска за новинарите во Париз владиниот портпарол, Оливие Веран.

„Кога одите некаде за викенд или на одмор, исклучете што е можно повеќе електрични уреди“, рече Веран по состанокот на владата. „Исклучете го вашиот Wi-Fi, намалете го малку клима уредот и секако, исклучете ги светилките кога не сте во собата“, порача портпаролот.

Претседателот Емануел Макрон ги повика бизнисите, граѓаните и локалните администрации да работат на планови за итни случаи во текот на летото за да се избегне суровата зима додека Европа се бори со најтешката енергетска криза во последните децении. Иако Франција е помалку зависна од рускиот гас отколку некои соседни земји, таа е вознемирена од проблемите во нејзините нуклеарни централи, кои обезбедуваат повеќе од половина од енергијата на земјата.

Макрон ја обвини Москва дека го користити гасот како оружје и предупреди дека Русија може целосно да го прекине извозот на енергијата. Европската унија денеска предложи блокот да ја намали потрошувачката на гас за 15 отсто во следните осум месеци поради загриженоста од таквиот потег.

Веран додаде дека одговорното однесување во однос на користењето на енергијата од страна на граѓаните е еден од клучевите за борба против глобалното затоплување.

Во моментов нема коментари за веста. Биди прв да коментира...

Остави коментар