.webp){kind=icon}
Обложувањата на пазарите кои укажуваат на уште две намалувања на каматните стапки од страна на Европската централна банка во 2024 година звучат „разумно“, вели членот на Управниот совет Франсоа Вилерој де Галхау.
„Нема да давам прогноза бидејќи тоа ќе зависи од податоците“, изјави тој за телевизијата БФМ Бизнис во петокот. „Повеќе гледаме на прогнозата за 2025 година отколку на флуктуациите во 2024 година бидејќи ќе има подеми и падови од месец во месец“. Тоа, според него значи дека тие се „слободни во нашите одлуки, но денес очекувањата на пазарот во однос на стапката ми изгледаат сосема разумни“.
Трговците прогнозираат намалување на стапката за 20 базични поени на следниот состанок за политика во септември. Сè уште се наклонети кон две кратења со таа големина до крајот на оваа година.
ЕЦБ ја задржа депозитната стапка на 3,75 отсто во четвртокот, при што претседателката Кристин Лагард рече дека следниот состанок на 11-12 септември би бил „широко отворен“. Сепак, со долготрајните инфлациски притисоци, официјалните лица стануваат се помалку убедени дека патот за уште две кратења е реален и не сакаат инвеститорите да претпоставуваат дека потегот во септември е однапред дефиниран, велат лица запознаени со ова прашање.
Говорејќи претходно во петокот, естонскиот колега на Вилерој, Мадис Мулер, предупреди да не се однапред посветени на одреден исход пред следниот состанок.
„Мислам дека е важно пред следниот состанок на Управниот совет на ЕЦБ во септември, да не ветуваме премногу“, рече тој. Мулер ги потврди очекувањата на пазарот за „барем уште едно намалување“, но додаде дека „јас лично не би коментирал“.
Говорејќи во интервју за локалното радио Арипаев, тој истакна дека инфлацијата на услугите од околу 4 отсто и растот на платите од 5 отсто „не се во согласност со целта од 2 отсто“. Сепак, „Мислам дека е реално дека во текот на следните 12 месеци, инфлацијата ќе продолжи да се ублажува“, рече тој.
Вилерој имаше попозитивен став, велејќи дека дезинфлацијата продолжува како што се очекуваше и дека стапката на раст на цените ќе продолжи со сигурност да забавува. Доаѓањето до целта за инфлација на ЕЦБ следната година е обврска, а не само предвидување, без шокови, рече тој.
Францускиот централен банкар, исто така, рече дека ЕЦБ посветува особено внимание на инфлацијата во услугите, каде што има „извесна лепливост“.
Осврнувајќи се на неговата матична земја, која е потресена од неизвесност откако претседателот Емануел Макрон распиша предвремени избори, Вилерој рече дека „се обрнува внимание“ на она што се случува.
„Постои прашањето за распонот, кој беше 50 базични поени со Германија пред распуштањето на парламентот – значително се зголеми, и денес е 65 базични поени“, рече тој. „Нема да ги предвидувам изборите што ќе бидат направени, но многу е важно Франција да ја задржи контролата врз својот јавен долг и нејзиниот јавен дефицит – тоа е она што најмногу ќе се следи“.
