Инфлацијата во Франција и во Шпанија падна под два отсто

Инфлацијата во Франција и во Шпанија падна под два отсто, поттикнувајќи ги облозите дека Европската централна банка (ЕЦБ) ќе го забрза темпото на намалување на каматните стапки.

Денешните податоци покажуваат дека потрошувачките цени во септември во Франција се зголемиле за 1,5 процент споредено со пред една година, а главната причина е падот на трошоците за енергија. Шпанија забележа сличен тренд, со намалување на инфлацијата на гориво, електрична енергија и на храна на 1,7 отсто.
Аналитичарите очекуваа и двете земји да пресметаат инфлација од 1,9 отсто.

Промени на стапката на инфлација во Франција и во Шпанија Bloomberg Mercury

Оладувањето на инфлацијата во членките на еврозоната овозможи ЕЦБ да ја намали својата депозитна стапка двапати годинава, што укажува на тоа дека започнал надолниот пат на монетарната политика. Сепак, изненадувачката контракција во економијата на приватниот сектор ги засили облозите дека монетарното олабавување наскоро ќе забрза.

По објавата утрово на овие податоци, на пазарите се зголемија облозите за уште едно намалување на стапката за 25 базични поени на 17 октомври, па сега шансите за такво сценарио се 70 проценти.

ЕЦБ, сепак, предупреди дека цените во регионот веројатно повторно ќе растат во текот на годинава, со тоа што инфлаторниот циклус се очекува конечно да заврши до крајот на следната година.

Креаторите на монетарната политика ќе добијат појасна слика за ситуацијата во текот на наредните денови, кога в понеделник Италија и Германија ќе ги објават податоците за месецов, а за еврозоната во целост податоците ќе се објават во вторник.

Промени на индексот на потрошувачки цени и на индексот на цените на енергентите во однос на поставената цел за инфлација од два отсто Bloomberg Mercury

Септемвриските податоци на Франција исто така покажаа умереност во услугите, каде што инфлацијата се намали на 2,5 од претходните три отсто.

Гувернерот на Банката на Франција, Франсоа Вилерој де Галхау, изјави дека ЕЦБ треба да пристапи постепено кон политиката на олабавување, внимавајќи да не се претера и да се надмине целта од два отсто. Националната централна банка предвидува дека инфлацијата во Франција ќе забави побрзо отколку во еврозоната, достигнувајќи 2,5 процента годинава, а 1,5 процент во 2025 година.

Во моментов нема коментари за веста. Биди прв да коментира...

Остави коментар