Повторно расте цената на природниот гас во Европа

Цените на природниот гас во Европа денеска се зголемија по три сесии на опаѓање, откако земјите од регионот предупредија дека претстои тешка зима.

Потенцијалот за прекини на руското снабдување во сезоната на шпицот на побарувачката останува во фокусот, одржувајќи ги цените покачени иако нивоата на складирање на гас во моментов се нормални за овој период од годината и има стабилен проток на гас.

Испораките преку Северен тек, главниот гасовод што ја поврзува Русија со континентот, се општо стабилни со околу 20 проценти од капацитетот на врската на крајот на јули, кога Москва ги намали испораките кои до тогаш изнесуваа 40 проценти од капацитетот. Руската компанија „Гаспром“ како главни причини за намалување на протокот ги наведе проблемите со одржувањето на турбините, вклучително и одложувањата поврзани со санкциите за враќање на опремата.

Европските власти сега се подготвуваат за менаџирање на енергијата во престојната зима.  Велика Британија планира неколку дена во текот на зимата да има организирани прекини на струја за индустријата, па дури и за домаќинствата. Градовите ширум Германија го намалуваат осветлувањето и топлата вода во обид да избегнат катастрофа.

Во меѓувреме, климатската криза се заканува да ги засили енергетските проблеми во регионот, што потенцијално ќе ги зголеми трошоците за електрична енергија. Реката Рајна ќе стане практично непловна на клучна точка во Германија на 12 август, поради ниските нивоа на водата предизвикани од топлотниот бран што го зафаќа регионот. Водниот пат е клучна артерија во Европа за транспорт на горива, јаглен и други индустриски производи.

Цената на холандскиот гас за месец однапред, која е европскиот репер се зголеми за 2 проценти до 196 евра за мегават-час.