Холандскиот авиопревозник КЛМ (KLM NV), најстара авиокомпанија во Европа, ја повика Европската Унија да донесе мерки за да се спротивстави на „нелојалната“ конкуренција од кинеските авиокомпании, на кои им е дозволено да летаат над воздушниот простор на Русија.
„Европа треба барем да погледне како може да го спречиме тоа нефер поле за игра со тоа што ќе одредиме цени или ќе преземеме нешто на поинаков начин“, рече главната извршна директорка на КЛМ, Марјан Ринтел, во вчерашното интервју за телевизиската програма ВНЛ (WNL).
Авиокомпаниите на ЕУ не можат да летаат над Русија од почетокот на инвазијата на Москва врз Украина (февруари 2022 година). Оттогаш е затворен и воздушниот простор над Украина. Тоа во однос на трошоците им дава предност на кинеските ривали, кои имаат пристап до рускиот воздушен простор.
Ринтел рече дека избегнувањето на рускиот воздушен простор додава од два до четири часа летање, што ги зголемува цените на нивните летови. Нејзините коментари доаѓаат во време кога некои европски авиокомпании размислуваат да ги ограничат своите летови до Кина.
„Бритиш ервејс“ (British Airways PLC) соопшти дека од овој месец до ноември идната година ќе ги запре летовите меѓу Лондон и Пекинг. „Дојче Луфтханза“ (Deutsche Lufthansa AG) исто така соопшти дека проценува дали треба да го прекине дневниот лет од Франкфурт до Пекинг, наведувајќи дека компанијата не успева да се натпреварува со авиокомпаниите од Персискиот Залив.
Минатата недела холандскиот разгранок на „Ер Франс“ (Air-France), КЛМ, започна акција за намалување на трошоците, што вклучува и одложување на инвестициите и процена на продажбата на споредните услуги.
.webp){kind=icon}
