За американските компании, ЕСГ-правилата се сериозна бариера за тргување со ЕУ

Американските компании го додаваат својот глас на листата критичари насочени кон регулативите за ЕСГ во Европа.

Американската стопанска комора при Европската Унија (ЕУ), чии членки се „Форд“ (Ford Motor Co.), „Ексон“ (Exxon Mobil Corp.) и „Амазон“ (Amazon.com Inc.), ја повикува ЕУ да ги одложи, па дури и да ги запре главните планови интегрирани во нејзините правила за заштита на животната средина, општествената одговорност и управувањето т.е. одговорното управување, се наведува во денешното соопштение. Во него се истакнува дека компаниите треба да бидат слободни да ги игнорираат регулативите за ЕСГ додека не се заврши ревизијата и не се измени законодавството.

Барањата го зголемуваат притисокот врз Германија и Франција, двете најголеми економии во ЕУ, да ги поедностават правилата за ЕСГ во услови на зголемена конкурентност и економски пад. Официјалните претставници на ЕУ на крајот на месецов треба да предложат измени на клучните регулативи.

„Во услови на значителна политичка несигурност додека трае поедноставувањето, бизнисите не треба да бидат принудени да се усогласат со законодавството што може значително да се промени“, велат од комората, позната како „Амчам“ (AmCham).

Директивата ЦСРД (CSRD), која од компаниите бара да обезбедат стотици податоци за ЕСГ, како и директивата ЦСДДД (CSDDD), која воведува законска одговорност ако компаниите дозволат прекршување на ЕСГ во нивните синџири на снабдување, сега се „главна грижа за трансатлантските бизниси“, велат од „Амчам“. Во соопштението се истакнува дека 84 проценти од членките што работат во ЕУ ги сметаат правилата за ЕСГ за „примарна бариера“ за трговијата.

„ЕУ треба веднаш да го запре времето за адаптација кон ЦСДДД и да го одложи спроведувањето на ЦСРД. Во исто време бизнисите треба да бидат сигурни дека нивните значителни инвестиции во усогласување и трансформација на нивните деловни модели не се залудно направени“, велат од „Амчам“.

Од американската комора велат дека речиси сите нивни членки го поддржуваат Парискиот климатски договор и инвестираат „значителни ресурси за спроведување одговорни деловни практики“. Но европската регулаторна рамка за ЕСГ треба да се реструктурира на начин што ќе овозможи компаниите да инвестираат „во зелената транзиција“ наместо во прекумерните барања за усогласеност, се наведува во извештајот.

Марија Луис Албукерке, комесарката за финансиски услуги на ЕУ, рече дека има простор за приспособување на правилата за ЕСГ на блокот во насока на критиките. Но таа исто така предупреди да не се очекува целосна дерегулација. „Станува збор за приспособување на темпото“, рече таа во едно неодамнешно интервју.

Комората ѝ препорачува на комисијата да ги консолидира барањата за планот за климатска транзиција, да обезбеди насоки за одредбите од ЦСРД најмалку две години пред нивното спроведување и да стори повеќе за да ги заштити синџирите на снабдување од ефектот на намалување на усогласеноста.

 

Во моментов нема коментари за веста. Биди прв да коментира...

Остави коментар