Француските власти бараат темелни реформи на европската регулаторна рамка, почнувајќи од правилата за ЕСГ (ESG), со цел да се одговори на падот на конкурентноста на блокот во глобални рамки.
Процесот на поедноставување треба да започне со „голема регулаторна пауза“, се вели во документ од 22 страници, што „Блумберг“ (Bloomberg) го доби на увид.
Освен тоа, неодамна донесените закони мора да се преиспитаат и да се прилагодат бидејќи, како што се наведува во документот од 20 јануари, „тие не се прилагодени на новиот контекст на зголемена меѓународна конкуренција и некооперативни политики на нашите главни глобални конкуренти“.
Прочитај повеќе
ЕСГ влегува во македонската регулатива преку законот за сметководство
Новиот закон за сметководство ќе биде донесен во текот на годинава.
14.01.2025
Политичките игри се главна пречка за ЕСГ во јавните претпријатија во регионот
Јавните претпријатија во регионот имаат можност да постигнат високи стандарди за управување.
04.10.2024
Банките во регионот полека го препознаваат потенцијалот на зелените кредити
Зелените кредити стануваат клучна алатка за финансирање одржливи проекти, овозможувајќи им на граѓаните и на компаниите да го намалат својот јаглероден отпечаток.
03.10.2024
Расте притисокот врз ЕУ
Францускиот предлог дополнително го зголемува притисокот врз Европската Унија (ЕУ), која веќе најави дека поедноставувањето на регулативата ќе биде клучен дел од нејзината агенда во следните пет години. Во нацрт-извештајот, што треба да се објави следната недела, ЕУ ветува досега невиден напор за поедноставување на регулативите со цел да се намалат обврските за известување за најмалку 25 проценти.
Повиците за прилагодување доаѓаат во време кога европските компании мора да имплементираат бројни нови барања за известување за аспектите на животната средина, социјалните и аспектите на управување (ЕСГ). Истовремено, нивните конкуренти во САД влегуваат во фаза на дерегулација, при што претседателот Доналд Трамп отфрли голем број зелени политики од мандатот на Бајден.
„Многу европски претприемачи изразија огромно незадоволство поради регулаторниот режим во ЕУ, наведувајќи дека побавниот раст овде е предизвикан од голем број фактори, а особено од регулативите“, рече Трамп во четвртокот за време на виртуелното обраќање во Давос.
Европа не смее да го игнорира променетиот политички контекст или економскиот товар што нејзината регулаторна рамка им го наметнува на компаниите, се наведува во францускиот документ. „ЕУ моментално губи 10 отсто од својот потенцијал за БДП“, се истакнува во францускиот манифест за поедноставување, цитирајќи го извештајот на поранешниот претседател на Европската централна банка (ЕЦБ), Марио Драги.
Франција, исто така, бара поедноставување на правилата за банкарскиот сектор, вклучително и дополнително одложување на примената на таканаречениот фундаментален преглед на трговските книги според Базел III.
Освен тоа, Франција предлага создавање нова категорија на средно-големи компании за да се намали нивниот регулаторен товар.
ЦСРД (CSRD) и новите правила под лупа
Развојот на ситуацијата значи дека двете најголеми економии на ЕУ сега јавно вршат притисок врз Европската Комисија (ЕК) да ги намали обврските поврзани со клучните регулативи кои би можеле да принудат дури 50.000 компании да известуваат за стотици ЕСГ показатели. Германија веќе повика на олабавување на правилата во рамки на Директивата за известување за корпоративна одржливост (ЦСРД-CSRD) бидејќи најголемата европска економија се соочува со пад.
Многу деловни субјекти и законодавци ја обвинуваат европската регулаторна рамка за губењето на конкурентноста на блокот, предупредувајќи дека ЦСРД бара непропорционални ресурси за да се обезбеди усогласеност. Француските власти нагласуваат дека промените на директивата се „итни“.
Европските акции остварија послаби резултати во споредба со американските | „Блумберг“ (Bloomberg)
Роберт Офел, претседател на Француското тело за сметководствени стандарди и поранешен шеф на финансискиот регулатор на земјата, неделава изјави дека сега има „заеднички консензус за потребата да се намали товарот на компаниите за да биде соодветен на предизвиците со кои се соочуваме“.
Маѓутоа, тој предупреди дека целосното укинување на европската регулаторна рамка за ЕСГ не е решение. Тој посочи дека бараните корекции првенствено се однесуваат на „опфатот и временската рамка“.
Европската Комисија би можела да поддржи значително ограничување на опсегот на ЦСРД, објави „Блумберг“, цитирајќи луѓе запознаени со процесот кои побарале анонимност поради доверливоста на дискусиите. Преговорите се во тек, а Комисијата продолжува да разгледува нови информации, додаваат изворите.
Преговорите ќе продолжат до 26 февруари, за кога е закажана расправа и можно усвојување на омнибус законодавството, рече портпаролот на Комисијата, мислејќи на законодавниот процес кој обединува повеќе предлози. Тој рок може да се промени, додава изворот.
Според сегашниот план, ЦСРД ќе важи за компании со најмалку 250 вработени и годишни приходи од 50 милиони евра. Првата група компании почна да собира податоци за ЦСРД уште минатата година, а нивната објава се планира за во годишните извештаи за 2024 година.
ЦСРД директивата е под притисок поради големите трошоци за прилагодување и влијанието на работењето | Depositphotos
Иако ЦСРД е важна „алатка“ за транзицијата на европската економија кон климатско неутрална иднина, барањата за известување треба „значително да се олеснат“, а метриката да се фокусира на „климатските цели“, се вели во францускиот документ. Исто така, големите компании треба да го ограничат обемот на информации што може да ги бараат од подизведувачите.
Франција бара и одложување на примената на Директивата за корпоративна одржливост и длабински анализи (ЦСДДД-CSDDD), која воведува нови правни ризици за компаниите кои не успеваат да спречат кршење на човековите права и еколошките стандарди во нивните ланци на снабдување. Измените се неопходни бидејќи сегашната верзија на законот може негативно да влијае на конкурентноста, „особено во однос на неевропските компании кои не подлежат на истите стандарди“.
Директивата за корпоративна одржливост и длабински анализи, усвоена минатата година, сè уште треба да се пренесе и инкорпорира во националните законодавства на земјите-членки на ЕУ. Таа веќе доживеа значително намалување на својот опсег.
Дополнително, Франција бара и ревизија на коефициентот на зелени средства (анг. green asset ratio), метрика што требаше да им помогне на инвеститорите да проценат колку се „зелени“ банкарски портфолија. Индустријата го критикуваше соодносот, посочувајќи дека е практично бескорисен поради начинот на кој се пресметува.
Сегашната методологија „го прави соодносот ирелевантен бидејќи во голема мера зависи од деловниот модел на банките и може да има негативни последици врз финансирањето на малите и средни претпријатија“, се вели во францускиот документ.
.webp){kind=icon}