Францускиот министер за финансии Бруно Ле Мар ќе работи заедно со својот германски колега Кристијан Линднер на координација на помошта за компаниите што се борат со високите цени на електричната енергија.
Франција беше меѓу првите земји што воведоа т.н. тарифен штит, трошејќи милијарди за да ги заштити потрошувачите и компаниите од остриот раст на цените на енергијата.
„Нема да војуваме меѓу себе во Европа. Вистинската тема се цените на енергијата во САД и особено во Азија. САД дејствуваат како блок, па и Европа мора да дејствува како блок“, рече Ле Мар за „Франс интер“.
Ле Мар в понеделник ќе се состане со Линднер во Париз, неколку дена пред официјалната државна посета на францускиот претседател Емануел Макрон во Вашингтон, кој го критикуваше законот за намалување на инфлацијата на американскиот претседател Џо Бајден. Американското законодавство предизвика загриженост во Европа поради влијанието од поддршката за компаниите вредна милијарди долари, а наменета за обновлива енергија. Ле Мар рече и дека ќе се бори да го задржи досегашниот систем што ја принудува компанијата „Електрисите де Франс“ (ЕДФ) да им продава електрична енергија по ниска цена на своите конкуренти.
Француската влада неодамна рече дека следната година ќе го намали количеството за продажба на електрична енергија во рамките на овој механизам на 20 терават-часа. Системот секоја година мора да го одобри Европската комисија.
Ле Мар рече дека половина од француските компании имаат корист од пониските цени на електрична енергија токму благодарение на претходно споменатото ограничување на цените за продажба од ЕДФ.
Системот е отворен во 2010 година, со цел да биде во согласност со правилата на пазарните натпреварувања во блокот, допуштајќи им на конкурентните доставувачи на електрична енергија во Франција да купуваат одредено количество нуклеарна енергија годишно од ЕДФ по одредена цена.
„Француските компании ќе бидат заштитени како и германските компании“, рече Ле Мар. Пред состанокот на министрите за енергетика на ЕУ следната недела, Ле Мар ја повика Европа да направи поголеми напори за да се договори за новиот механизам за намалување на цените на енергијата.
.webp){kind=icon}