Европската централна банка (ЕЦБ) ја задржа каматната стапка на депозитите на 2 отсто на својот најнов состанок, што е трета ваква одлука во низа. Каматната стапка не се менува од почетокот на јуни, а аналитичарите не очекуваат значителни промени наскоро.
ЕЦБ ја донесе оваа одлука во време кога економијата на еврозоната се држи релативно стабилно, иако глобалните трговски тензии продолжуваат да ја вознемируваат економската клима. Според прелиминарните процени на Евростат, бруто-домашниот производ (БДП) на еврозоната пораснал за 0,2 отсто во третото тримесечје од 2025 година, во споредба со претходните три месеци, а исто така се зголемил за 1,3 отсто во однос на истиот период од минатата година.
Инфлацијата во еврозоната останува блиску до целта на ЕЦБ од 2 отсто. Според последните податоци, потрошувачките цени пораснале за 2,2 отсто на годишно ниво во септември, што е благо зголемување од 2,1 отсто во август и 2 отсто во јули. Основната инфлација, која ја исклучува променливата цена на храната и на енергијата, изнесува 2,4 отсто во септември, што е раст од 2,3 отсто во август.
Иако Европската Унија се соочува со притисоци од американските царини и војната во Украина, претседателката на ЕЦБ, Кристин Лагард, во последните недели нагласи дека монетарната политика на банката се наоѓа на „добро место“. Според Лагард, царините од САД досега немаат големо влијание на инфлацијата, а ефектите на економскиот раст се „релативно умерени“. На годишната средба на Меѓународниот монетарен фонд (ММФ) во Вашингтон, Лагард изјави дека ЕЦБ е добро подготвена да се справи со евентуални економски шокови.
Во меѓувреме, американската централна банка (Фед) синоќа ја намали својата каматна стапка по вторпат годинава, со што клучната каматна стапка се симна на околу 3,9 отсто. Фед ја донесе оваа одлука со цел да ги стимулира економскиот раст и вработувањето, иако инфлацијата останува висока.
Јапонската централна банка, пак, ја задржа својата каматна стапка на 0,5 отсто и покрај тоа што инфлацијата е над нивната цел од 2 отсто, но остави можност за зголемување на каматите во декември.
Експертите очекуваат дека на прес-конференцијата на ЕЦБ по седницата, централната банка ќе понуди дополнителни информации за влијанието на трговските царини и за економските последици од фискалната криза во Франција.
.webp){kind=icon}
