Во 2021 година, 95,4 милиони луѓе во ЕУ, што претставува 21,7 проценти од населението, беа изложени на ризик од сиромаштија или социјална исклученост, соопшти „Евростат“. Станува збор за лица коишто живеат во домаќинства кои се соочуваат со најмалку еден од трите ризици од сиромаштија и социјална исклученост (ризик од сиромаштија, тешка материјална и социјална депривација и/или живеење во домаќинство со многу низок интензитет на работа). Ова е благ пораст во споредба со 2020 година (94,8 милиони, 21,6 проценти од населението).
„Меѓу 95,4 милиони луѓе во ЕУ кои се соочија со ризик од сиромаштија или социјална исклученост, околу 5,9 милиони (1,3 проценти од вкупното население) живееја во домаќинства кои ги доживуваат сите три ризици од сиромаштија и социјална исклученост истовремено. Во 2021 година, 73,7 милиони луѓе во ЕУ беа во ризик од сиромаштија, додека 27 милиони беа сериозно материјално и социјално обесправени, а 29,3 милиони живееја во домаќинство со низок интензитет на работа“, информира „Евростат“.
Ризикот од сиромаштија или социјална исклученост варира низ земјите-членки на ЕУ. Највисок процент на луѓе со ризик од сиромаштија или социјална исклученост е забележан во Романија (34 проценти), Бугарија (32 проценти), Грција и Шпанија (и двете по 28 проценти). Спротивно на тоа, најмал удел на луѓе со ризик од сиромаштија или социјална исклученост се забележани во Чешка (11 проценти), Словенија (13 проценти) и Финска (14 проценти).
.webp){kind=icon}
