Меѓународниот монетарен фонд (ММФ) во својот редовен извештај од мисијата спроведена од 18 до 31 март годинава ги поздрави заложбите за фискална консолидација, со цел буџетскиот дефицит на државата да се намали на 3,5 отсто од БДП во 2026 година.
Според фондот, продолжувањето на консолидацијата на среден рок би овозможило дефицитот да се сведе на два отсто до 2030 година, додека потенцијални придобивки за приходната страна може да произлезат од намалување на даночните ослободувања по основ на ДДВ, зајакнување на даночната администрација и намалување на сивата економија.
Економијата забележала раст од 3,5 отсто во 2025 година, пред се поради инвестиции во градежништвото и силна приватна потрошувачка, поддржана од раст на платите и кредитирањето.
ММФ проектира дека реалниот раст на БДП ќе забави на 3,1 отсто во 2026 година, приближувајќи се кон проценетиот потенцијал од околу три отсто на среден рок. Инфлацијата се намалила од 4,8 отсто во јули 2025 година на 2,9 отсто во февруари 2026 година.
Фондот предупредува дека глобалните ценовни шокови на енергијата, предизвикани од конфликтот на Блискиот Исток, може да ја забават економската активност и да ја задржат инфлацијата на повисоко ниво подолго време.
Ефективната имплементација на структурни реформи може да ја зголеми продуктивноста, да ја зајакне конкурентноста и да придонесе за побрзо доходовно приближување кон Европската Унија. Особено се нагласува значењето на реформите во енергетскиот сектор за стабилна енергетска инфраструктура и развој на обновливи извори на енергија.
Консултациите по Член 4 на ММФ се редовни и се спроведуваат еднаш годишно за да се оцени економската и фискалната политика на земјата.
.webp){kind=icon}
