Македонија слави 35 години независност: Што покажуваат бројките?

Во Македонија денес се слави 8 Септември – Денот на независноста односно 35 години од прогласувањето суверена и самостојна држава. Нашата земја во овој период мина низ многу премрежија на политички и на економски план, што резултираше со бавен наместо забрзан развој. Поради тоа, Македонија во континуитет го губи најголемиот капитал – луѓето, што најдобро го илустрираат негативните демографски показатели.

Исчезнува активното население   

Иселувањата на младите и негативниот природен прираст придонесоа македонското население да старее.

Тоа резултира со намалување на бројот на активно население и недостиг од работници на пазарот на труд.

Доколку не дојде до промени, извесно е дека во наредниот период ќе дојде до значително намалување на македонското население, што секако ќе има негативни последици врз целокупната економија.

Бавен развој

Во изминативе 35 години Македонија не успеа во континутитет да оствари високи стапки на економски раст.

Поради тоа нашата земја е на дното во Европа по бруто домашниот производ по глава на жител.

Странски инвестиции и трговија

Во изминативе децении нашата земја постигна релативен успех во однос на привлекувањето на странски инвестиции.

Сепак, треба да се напомене дека со развојот на технолошките зони станавме препознатлива дестинација за инвеститори од автомобилската индустрија односно извозници на автомобилски делови.

Тоа имаше позитивен придонес врз целокупниот македонски извоз, кој сепак се уште не е доволен за намалување на трговскиот дефицит. Македонија и понатаму останува увозно зависна за повеќе видови производи.

Континуирано задолжување  

Во последните две децении нашата земја бележи огромен скок на јавниот долг, кој веќе надмина 10 милијарди евра.

Каратеристично е што многу мал дел од новите задолжувања без искористени за инфраструктурен развој, што е еден од главните услови за зголемување на конкуретноста на македонската економија и забрзан економски пораст.

Плати и инфлација

Иако не со посакуваното темпо, во земјава има континуиран раст на просечните плати.

Сепак, прашање е колку е тој доволен за подобрување на животниот стандард на населението, посебно ако се земе предвид движењето на стапката на инфлација.

Кредити, штедење и камати

Статистичките податоци покажуваат дека во изминативе неколку години во нашата земја има значителен пад на каматите на кредитите.

Тоа е една од главните причини што македонските граѓани уриваат рекорди во земање станбени и потрошувачки кредити.

Нашата нација или барем дел од неа веќе покажа дека сака да штеди, без оглед на тоа како се движат каматите на депозитите. Како резултат на тоа, депозитната база кај македонските банки непрестано расте.

Не старее само населението

За одбележување е дека Македонија бележи значителен раст на бројот на регистрирани автомобили.

За жал, многу мал дел од нив се нови. Податоците покажуваат дека како што расте возниот парк, расте и просечната старосна граница на автомобилите. 

Тоа секако не влијае позитивно на безбедноста и на животната средина, чија заштита останува едно од најзанемарените прашања во независна Македонија.