Во моментот ги имаме речиси сите дестинации од пред пандемијата, освен Доха и Дубаи, за кои знаеме дека се особено важни како транзитни конекции за македонската дијаспора во Австралија и Нов Зеланд и се обидуваме да ги вратиме, рече генералниот директор на ТАВ Македонија, Метин Батак, во разговорот со Блумберг Адрија ТВ.
Тој нагласи дека компанијата постојано има контакти и средби со авиопревозниците, но, како што рече, додека не добијат официјална потврда, не можат да објават нови линии.
Во првите девет месеци од годинава, ТАВ Македонија има пораст од 82 отсто во патничкиот сообраќај во однос на минатата година.
Според генералниот директор, тоа најмногу се должи на фактот што откако попуштија ковид-мерките „луѓето се гладни за патување“.
„Во однос на македонските аеродроми, закрепување во фреквентноста на патувањата почнавме да чувствуваме во вториот квартал од годинава, кога повеќето ЕУ-земји почнаа да ги укинуваат забраните за патување за лицата со македонски пасоши“, рече директорот Батак, додавајќи дека 78 отсто од патничкиот сообраќај на компанијата се реализира во Европа.
Летната сезона била главниот двигател за закрепнувањето во однос на патувањата и за време на летните месеци било забележано силно зголемување на сезонските летови на двата македонски аеродрома.
„Во првите девет месеци од 2022 година имаме зголемување на патничкиот сообраќај за 82 отсто во споредба со 2021 година. Во споредба со нивото од 2019 година, која се смета како референтна година во авијацијата, достигнавме 88 отсто. За следната година очекуваме да ги достигнеме речиси истите бројки на патувања од 2019 година“, вели генералниот директор на ТАВ, според кого авиосообраќајот ќе биде популарен и покрај инфлацијата и енергетската криза, бидејќи е полесен и поудобен начин за патување, а луѓето заштедиле пари за патување за време на пандемијата.
.webp){kind=icon}
