„Економското забавување во Европа ќе се одрази на македонскиот извоз, бидејќи најголем дел од трговската размена на земјава се одвива токму со ЕУ“, вели Дарко Лазаров, претседател на Клубот на извозници при Стопанската комора на Македонија.
„Со оглед на тоа дека последните проекции на ЕУ за економската состојба во 2023 година се исклучително неповолни, со минимален економски раст во позитива и сѐ уште висока инфлација, тоа секако дека ќе се одрази врз македонскиот извоз, особено врз автомобилската, машинската, металопреработувачката, текстилната индустрија, прехранбениот сектор итн., кои се најголеми извозници“, вели Лазаров во своето гостување на Блумберг Адрија ТВ. Според него, тоа што голем дел од извозот од Македонија е концентриран само во неколку држави во ЕУ ја прави ранлива трговската размена доколку дојде до пад на економската активност во некоја од државите трговски партнери.
Тој го истакнува хроничниот проблем на голем трговски дефицит и слабоконкурентните македонски производи на странските пазари.
Лазаров очекува пад на извозот во последниот квартал годинава, што дополнително ќе го зголеми трговскиот дефицит. Затоа, тој повторно повикува на целни мерки за помош на извозниците.
„Во овој момент македонската влада нема таргетирани мерки за поддршка на извозот, и покрај тоа што имаше барања од голем број извозно ориентирани компании, особено од енергетски интензивните сектори, како рударската индустрија, машинската, металопреработувачката итн.“, вели Лазаров.
Целиот разговор со Дарко Лазаров, претседател на Клубот на извозници при СКМ, погледнете го во видеото.
.webp){kind=icon}
