.webp){kind=icon}
Американската стопанска комора во Северна Македонија (АмЧам Северна Македонија) го одржа своето 22. Генерално собрание на кое беа избрани четири нови членови на Одборот на директори и беше направен преглед на најзначајните реализирани проекти и активности од изминатата година.
За изборот на нови членови на Одборот на директори гласаа повеќе од 70 членки на асоцијацијата. Со најмногу гласови од присутните, мандатот од две години им беше доделен на Андреј Петрески („Циско“), Иван Новаковски (НОВА), Ламбро Патче (Пивара Скопје) и Славко Пројкоски (Македонски Телеком).
На Собранието се обрати американската aмбасадорка во земјава, Анџела Агелер, која се заблагодари на членките на АмЧам и истакна дека тие претставуваат значајна врска која ги спојува економиите на САД и Северна Македонија. Таа им посака успешна работа и уште многу реализирани активности со кои, како што рече, ќе се поддржи развојот на локалната економија и ќе се воспостави регионалната соработка, како клучен фактор за понатамошен развој на целиот регион.
Претседателот на Одборот на директори на АмЧам, Драган Давитков, во своето обраќање се осврна на важноста од развој на одржливи регионални партнерства и иницијативи.
„Како бизнис асоцијација ние сме ориентирани кон градење на партнерства со Владата, бизнисите и меѓународните организации, но исто така и со невладиниот сектор и донаторската заедница. Ние веруваме дека само со здружени напори, усогласени приоритети, транспарентни процеси и мерливи резултати можеме да се издигнеме над кризите кои што светот ги искусува. Ние како земја долго време зборувавме за важноста на градење мостови, а сега е времето да почнеме да преминуваме преку тие мостови и да ги оствариме зацртаните цели“, рече Давитков.
