.webp){kind=icon}
Уште на почетокот на нашиот мандат, со оглед на геополитичките околности во тој период, ни беше јасно дека ќе мора да работиме на оптимизација на трошоците, рече градоначалникот на Аеродром, Тимчо Муцунски во гостувањето на „Блумберг Адрија ТВ“, запрашан за тоа како општината ги менаџира проблемите во поглед на енергетската криза.
„Некои мерки беа проактивни и долгорочни како поставувањето на фотоволтаици на крововите на сите основни училишта, што ги поврзавме со градинките во близина на училиштата. Почнавме да вложваме во енергетски ефикасни фасади и прозорци, а размислуваме и за модернизација на целокупниот модел на улично осветлување, при што во овој период, кога состојбата веќе станува критична, почнавме со рационализација на трошењето на струја за јавно осветлување“, посочува Муцунски, но додава дека општинските училишта сепак ќе ја користат мерката да се префлат на регулиран пазар бидејќи производството од фотоволтаици во зимскиот период е недоволно за да се покријат целокупните потреби на училиштата.
Градоначалникот вели дека следната година Аеродром ќе има разавоен буџет и најави дека општината ќе биде прва во државата која ќе издаде зелена обврзница, за што веќе се во консултации со сите надлежни институции, особено Комисијата за харии од вредност.
„Обврзницата ќе биде во износ од околу 330 милиони денари, а целта е покрај оптимизација на трошоците и намалување на непродуктивните трошоци, да го реализираме и тоа што сме го ветиле во кампањата и да продолжиме со реализација на големи, капитални инвестиции - две до три нови градинки, целосна реконструкција на две основни училишта, нов плоштад во Аеродром, нови паркови...“, посочи Муцунски.
Целиот разговор со градоначалникот на Аеродром, проследете го на видеото во рамки на објавата.
