Бројот на угостителски деловни единици (ресторани, кафеани, гостилници, хотели и друго) во Македонија на крајот од минатата година изнесувал 1.187, што е намалување за 937 во однос на претходната година и убедливо најниска бројка од 1997 година наваму, покажуваат податоците на Државниот завод за статистика.
Иако од Државниот завод за статистика нагласуваат дека податоците за индивидуалните угостителски дуќани за 2021 година сè уште не биле достапни при подготовката на годишната публикација од оваа област, јасно е дека пандемијата на ковид-19 го зеде својот данок и принуди голем број угостители да ги затворат објектите. Тоа предизвика и намалување на бројот на работници во угостителството за околу 3.000 лица во 2021 година во однос на претходната година.
Значителен пад на прометот
Статистиката открива изразено намалување на бројот на кафеани, ресторани, гостилници, пицерии и кафе-барови.
Забележителен пад има и кај прометот на угостителите, и тоа од 16,6 милијарди денари (270 милиони евра) во 2019 година на 11,2 милијарди денари (182 милиони евра) во минатата година.
Кај угостителите лани сме испиле алкохол за 21 милион евра
Угостителите лани најмногу пари, односно околу 5,6 милијарди денари (околу 91 милион евра), инкасирале од продажба на храна, а истовремено вкупниот цех за алкохолни пијалаци (пиво, вино, ракија и други жестоки пијалаци) изнесувал 1,3 милијарда денари (околу 21 милион евра).
Забележително е дека кај одредени пијалаци остварениот промет во минатата година е преполовен во однос на 2019 година, кога сè уште живеевме без пандемија. Драстично намалување во овој период има и на прометот остварен од продажба на кафе и безалкохолни пијалаци.
.webp){kind=icon}
Во моментов нема коментари за веста. Биди прв да коментира...